ភ្នំពេញ៖គូសង្សារបានស្គាល់តាមទូរសព្ទនិងស្រឡាញ់គ្នាជាង១ឆ្នាំ ខាងប្រុសនាំចូលផ្សារទិញខោអាវបញ្ឆោតឱ្យនាងអង្គុយចាំក៏យកម៉ូតូខាងស្រីម៉ាកហុងដាឌ្រីមជិះចេញទៅបាត់។ហេតុការណ៍នេះបង្កឱ្យមានការភ្ញាក់ផ្អើលនៅផ្សារឯករាជ្យ១ សង្កាត់ចោមចៅទី១ ខណ្ឌពោធិ៍សែនជ័យ កាលពីថ្ងៃទី២៨ ខែវិច្ឆិកា។
នគរបាលប៉ុស្តិ៍ចោមចៅទី១ បានឱ្យដឹងថា ស្ត្រីរងគ្រោះឈ្មោះឡុង ថុនា អាយុ២៧ឆ្នាំ នៅស្រុកបសេដ្ឋ ខេត្តកំពង់ស្ពឺ។ចំណែកជនសង្ស័យមិនស្គាល់សាវតារទេ បានត្រឹមស្គាល់ឈ្មោះ ម៉ៅ អាយុ២៨ឆ្នាំ ដោយអះអាងថាជាមន្ត្រីនគរបាលនៅស្រុកស្អាង ខេត្តកណ្តាល។
ម៉ូតូដែលជនសង្ស័យបោកយកម៉ាកហុងដាឌ្រីម ឆ្នាំ២០២០ មិនចាំផ្លាកលេខ ព្រោះខ្ចីម្តាយមីងជិះ។នៅក្រោមកែបម៉ូតូមានទូរសព្ទ OPPO មួយគ្រឿង–លុយជាង១០០ដុល្លារនិងឯកសារមួយចំនួន។
មុនកើតហេតុ បុរសសង្សារបាននាំនាងចូលផ្សារទិញសម្លៀកបំពាក់។ដល់តូបលក់ខោអាវក៏ឱ្យនាងរង់ចាំមួយភ្លែតព្រោះមេហៅទៅជួប។ដោយទុកចិត្ត នាងក៏ឱ្យទៅ ហើយបុរសនោះក៏ចេញយកម៉ូតូពីកន្លែងផ្ញើជិះទៅបាត់ឈឹង។
នាងចាំបាត់ៗជិត៣ម៉ោងទូរសព្ទខលក៏មិនចូល រហូតដល់រសៀលថ្ងៃដដែលនាងសម្រេចចិត្តទៅដាក់ពាក្យបណ្តឹងនៅប៉ុស្តិ៍នគរបាលចោមចៅទី១ ឱ្យជួយស្រាវជ្រាវជុំវិញករណីឆបោកខាងលើនេះ៕ដោយ៖វិចិត្រ