ភរិយារបស់លោកហ្សេឡិនស្គី មេដឹកនាំអ៊ុយក្រែន នៅដើមសប្តាហ៍នេះបានប្រកាសថ្កោលទោសទាហានរុស្ស៊ីជាសាធារណៈលើអំពើហិង្សាផ្លូវភេទជាប្រព័ន្ធដាក់ប្រជាជនស្លូតត្រង់អ៊ុយក្រែន។
លោកស្រី Olena Zelenska ដែលស្គាល់ថាជាស្រ្តីទីមួយ និងជាភរិយារបស់លោកហ្សេឡិនស្គី បាននិយាយនៅក្នុងសន្និសីទអន្តរជាតិស្តីពីការការពារអំពើហិង្សាផ្លូវភេទ នៅទីក្រុងឡុងដ៍កាលពីថ្ងៃចន្ទទី២៨វិច្ឆិកាថា ទាហានរុស្ស៊ីត្រូវតែទទួលខុសត្រូវចំពោះការរំលោភបំពានរាងកាយលើស្ត្រីអ៊ុយក្រែន និងប្រព្រឹត្តអំពើហិង្សាផ្លូវភេទផ្សេងទៀតក្នុងអំឡុងពេលសង្គ្រាមនៅអ៊ុយក្រែន។ លោកស្រីបានលើកឡើងនូវភ័ស្តុតាងខ្សែអាត់របស់ក្រុមទាហានរុស្ស៊ី ខណៈពេលដែលនិយាយតាមទូរសព្ទអំពីសកម្មភាពស្មោគគ្រោកនេះទៅកាន់ក្រុមគ្រួសារសាច់ញាតិរបស់ពួកគេ។
ការថ្កោលទោសបាននិយាយថា “អំពើហិង្សាផ្លូវភេទគឺជាវិធីដ៏សាហាវបំផុត និងជាអំពើសត្វនិយមបំផុត ដែលបញ្ជាក់ពីភាពជិះជាន់លើនរណាម្នាក់”។ “ហើយសម្រាប់ជនរងគ្រោះនៃអំពើហិង្សាបែបនេះ វាពិបាកក្នុងការផ្តល់សក្ខីកម្ម រកយុត្តិធម៌ឲ្យខ្លាំងណាស់ ពិសេសក្នុងសម័យសង្គ្រាមបែបនេះ ព្រោះជាធម្មតាគឺគ្មាននរណាម្នាក់សុវត្ថិភាពរួចទៅហើយ”។ លោកស្រីបានចាត់ទុកអំពើទាំងនេះជាអាវុធថ្មីមួយទៀតរបស់រុស្ស៊ី ក្រៅតែពីការបាញ់ផ្លោង ខណៈរុស្ស៊ីកាន់តែបានចិត្ត និងហ៊ានធ្វើដោយបើកចំហ។
ជុំវិញការចោទប្រកាន់នេះ ក្រសួងការពារជាតិរុស្ស៊ីមិនមានសេចក្តីអត្ថាធិប្បាយឆ្លើយតបនោះទេ។ សំណុំរឿងរំលោភបំពានដដែលៗ ត្រូវបានរាយការណ៍ជាហូរហែនៅអ៊ុយក្រែន ដែលបានកើតឡើងទៅលើស្ត្រីអ៊ុយក្រែនជាច្រើននាក់ រាប់ចាប់តាំងពីស្រ្តីវ័យក្មេង រហូតដល់ស្រ្តីអាយុប្រហែល៧០ឆ្នាំ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
