ក្រុមម្ចាស់ជើងឯក ៥សម័យកាលប្រេស៊ីល និងក្រុមព័រទុយហ្គាល់របស់កីឡាករ Cristiano Ronaldo បានចូលរួមជាមួយក្រុមជម្រើសជាតិបារាំង ក្នុងការបានឡើងទៅវគ្គចាញ់ធ្លាក់ ក្នុងព្រឹត្តិការណ៍ World Cup ជាមួយនឹងការនៅសល់ ១ហ្គេមទៀត នៅថ្ងៃដ៏តានតឹងនៃការប្រកួតគ្នា ក្នុងប្រទេសកាតា កាលពីថ្ងៃចន្ទ។
ការប្រកួតរបស់ក្រុមព័រទុយហ្គាល់ទល់នឹងក្រុមអ៊ុយរូហ្គាយ ដែលពួកគេបានឈ្នះ ក្នុងលទ្ធផល ២-០ ត្រូវបានរំខានមួយភ្លែត ដោយសារមានអ្នកចូលលុកលុយទីលាន ដែលមានកាន់ទង់ឥន្ទធនូ និងពាក់សារគាំទ្រដល់ប្រទេសអ៊ុយក្រែនដែលហែកហួរដោយសង្គា្រម និងស្ត្រីអ៊ីរ៉ង់។
ខ្សែបម្រើ Bruno Fernandes របស់ក្លិប Manchester United មានគុណសម្បត្តិយ៉ាងធំធេង សម្រាប់ក្រុមព័រទុយហ្គាល់ ដោយធ្វើបានសម្រេច ១គ្រាប់ នៅដើមវគ្គទី ១ ជាមួយការ ស៊ុតបាល់បញ្ចូលទី ដោយការលើកបាល់ចូលតំបន់គ្រោះថ្នាក់ (ស្ទើរស៊ុតស្ទើរបញ្ជូន) មុនពេលទម្លុះសំណាញ់ទី ១គ្រាប់ទៀត ដោយការទាត់បាល់ប៉េណាល់ទី ក្នុងម៉ោងបន្ថែមមានរបួស។
កីឡាករ Ronaldo បានធ្វើការអបអរ ចំពោះគ្រាប់បាល់ទី ១ ដោយគិតថា ជាការតែតបញ្ជូលទីរបស់ខ្លួន ប៉ុន្តែ FIFA (សហព័ន្ធបាល់ទាត់អន្តរជាតិ) បានសម្រេចថា រូបគេមិនបានប៉ះបាល់នោះទេ ដោយនេះបានបដិសេធគ្រាប់បាល់ទី៩ នៅ World Cup ដែលនឹងជាចំនួនធ្វើឱ្យរូបគេស្មើនឹងកម្រិតរបស់អតីតវីរបុរសរបស់ក្រុមព័រទុយហ្គាល់ លោក Eusebio។
ក្រុមព័រទុយហ្គាល់ឈរលើគេក្នុងពូល H ដោយមាន ៦ពិន្ទុ ក្រោយបញ្ចប់ការប្រកួត ២លើក ពោលគឺនាំមុខ ៣ពិន្ទុលើក្រុមហ្គាណា ដែលបានយកឈ្នះក្រុមកូរ៉េខាងត្បូងរបស់ Son Heung-min ៣-២។ ក្រុមរបស់អាស៊ី និងក្រុមអ៊ុយរូហ្គាយ មាន ១ពិន្ទុស្មើគ្នា មុនឆ្ពោះទៅប្រកួតចុងក្រោយក្នុងពូលនៅថ្ងៃសុក្រនេះ។
ក្រុមព័រទុយហ្គាល់បានកក់កៅអីរបស់ពួកគេ ក្នុងវគ្គចាញ់ធ្លាក់ នៅកាតាប៉ុន្មានម៉ោង បន្ទាប់ពីក្រុមប្រេស៊ីល បានឡើងទៅមុន ជាមួយនឹងគ្រាប់បាល់ចុងម៉ោង ដែលស៊ុតបញ្ចូលទីដោយខ្សែបម្រើ Casemiro របស់ក្រុមបិសាចក្រហម Manchester United។ កីឡាករវ័យ ៣០ឆ្នាំ អាចបំប៉ោងសំណាញ់ទីបាននៅនាទីទី៨៣ នៃការប្រកួត ក្នុងពូល G របស់ក្រុមប្រេស៊ីល ទល់នឹងក្រុមស្វីស ដើម្បីឱ្យក្រុមទៅពីតំបន់អាម៉េរិកឡាទីន (អាម៉េរិកខាងត្បូង) ឈ្នះ ១-០ នៅកីឡដ្ឋាន 974។
ក្រុមប្រេស៊ីល ឈរជាប្រធានពូល G ដោយមាន ៦ពិន្ទុ ខណៈក្រុមលេខ ២ ស្វីស មាន ៣ពិន្ទុ។ ចំណែកក្រុមកាមេរូន និងស៊ែប៊ី មាន ១ពិន្ទុដូចគ្នា ក្រោយប្រកួតស្មើគ្នា ៣-៣៕