ក្រុមប៉ូលិសបានប្រើប្រាស់កាំភ្លើងបាញ់ទឹក និងឧស្ម័នបង្ហូរទឹកភ្នែក ដើម្បីតបត បន្ទាប់ពីរងការវាយប្រហារពីអ្នកគាំទ្របាល់ទាត់ ដែលនាំគ្នាបំផ្លិចបំផ្លាញរបស់របរ នៅកណ្តាលក្រុងព្រុចសែល កាលពីថ្ងៃអាទិត្យ បន្ទាប់ពីការប្រកួត ក្នុងព្រឹត្តិការណ៍ World Cup នៅប្រទេសកាតា ដែលក្រុមជម្រើសជាតិម៉ារ៉ុក យកឈ្នះក្រុមបែលហ្ស៊ិក ២-០។
អ្នកគាំទ្ររាប់សិបនាក់ បាននាំគ្នាវាយកម្ទេចហាងនានា បាញ់កាំជ្រួចដៃ និងដុតរថយន្ត។ ប៉ូលិសក្រុងព្រុចសែល បានឱ្យដឹងនៅក្នុងសេចក្តីថ្លែងការណ៍មួយថា សូម្បីតែមុនពេលចប់ការប្រកួត មនុស្សរាប់សិបនាក់ រួមទាំងអ្នកពាក់អាវក្រណាត់មានមួកមួយចំនួន បានព្យាយាមមកប្រឈមជាមួយក្រុមប៉ូលិស ដែលនេះធ្វើឱ្យប៉ះពាល់ដល់សុវត្ថិភាពសាធារណៈ។
អ្នកនាំពាក្យម្នាក់ បាននិយាយថា អ្នកគាំទ្រមួយចំនួន ប្រដាប់ដោយដំបង ហើយអ្នកកាសែតម្នាក់ បានរងរបួសមុខដោយកាំជ្រួច។ ប៉ូលិសប្រហែល ១០០នាក់ ត្រូវបានប្រមូលផ្ដុំ ខណៈអ្នករស់នៅទីនោះ ត្រូវបានព្រមានឱ្យចៀសវាងតំបន់ខ្លះនៃកណ្តាលទីក្រុង។ ស្ថានីយ៍រថភ្លើងក្រោមដី និងផ្លូវនានា ត្រូវបានបិទ ដើម្បីទប់ស្កាត់ការរាលដាលនៃអំពើហិង្សា។
ងាកទៅការប្រកួតឯណោះវិញ ក្រុមបែលហ្ស៊ិក ដែលបានជាប់ចំណាត់ថ្នាក់លេខ ៣ នៅរុស្ស៊ីកាលពី ៤ឆ្នាំមុន អាចបានសិទ្ធិឡើងទៅកាន់វគ្គ ១៦ក្រុមចុងក្រោយ ជាមួយនឹងជ័យជម្នះ ប៉ុន្តែជំនួសមកវិញនូវការទម្រង់លេងដ៏យ៉ាប់មួយផ្សេងទៀត បន្ទាប់ពីឈ្នះការប្រកួតបើកឆាក ដោយសំណាងលើក្រុមកាណាដា។
កីឡាករបម្រុង Abdelhamid Sabiri គឺជាវីរបុរស ដោយសារការស៊ុតឱ្យមានគ្រាប់បាល់នាំមុខ នៅនាទីទី៧៣ មុនពេល Zakaria Aboukhlal ដែលជាកីឡាករបម្រុងដូចគ្នា ជួយធានាជ័យជម្នះឱ្យក្រុមម៉ារ៉ុក នៅក្នុងម៉ោងបន្ថែមមានរបួស។
ក្រុមម៉ារ៉ុក បានឡើងទៅជំនួសក្រុមបែលហ្ស៊ិក ដោយការឈរទី ១ ក្នុងពូល F ហើយបានដឹងច្បាស់ថា ពួកគេនឹងមានសិទ្ធិទៅវគ្គចាញ់ធ្លាក់ជាលើកដំបូង ចាប់តាំងពីឆ្នាំ១៩៨៦ ប្រសិនបើពួកគេអាចគេចពីបរាជ័យ ពេលប៉ះក្រុមកាណាដា ក្នុងហ្គេមចុងក្រោយ នៅថ្ងៃព្រហស្បតិ៍៕