ក្រោយបានច្បាំងនៅអ៊ុយក្រែនអស់រយៈពេលជាច្រើនខែមកនេះ ប្រទេសរុស្ស៊ីបានចំណាយទឹកប្រាក់ជាតិប្រចាំឆ្នាំអស់ចំនួន ៨២ពាន់លានដុល្លារ។
យោងតាមការគណនាដោយទស្សនាវដ្តី Forbes បានឲ្យដឹងកាលពីថ្មីៗនេះថា ក្នុងអំឡុងពេលប្រាំបួនខែនៃការលុកលុយប្រទេសអ៊ុយក្រែន រដ្ឋាភិបាលរុស្ស៊ីបានចាយថវិកាអស់ចំនួន ៨២ពាន់លានដុល្លារ ដែលស្មើនឹងមួយភាគបួននៃថវិកាជាតិប្រចាំឆ្នាំ។ ប្រភពនេះបានបន្តលម្អិតទៀតថា ការចំណាយរបស់រុស្ស៊ីភាគច្រើនគឺផ្តោតទៅលើគ្រាប់រំសេវ និងយោធា។ ក្នុងនោះរុស្ស៊ីបានប្រើប្រាស់សម្បកគ្រាប់ចាប់ពី ១០.០០០ ទៅ ៥០.០០០ គ្រាប់ក្នុងមួយថ្ងៃ ខណៈតម្លៃជាមធ្យមនៃសំបកគ្រាប់មួយគឺមានតម្លៃប្រហែល ១០០០ ដុល្លារ។ បន្ថែមពីនេះ រុស្ស៊ីបានបាញ់កាំជ្រួចច្រើនជាង ៤.០០០ ដើមនៅអ៊ុយក្រែនផងដែរ ដែលតម្លៃជាមធ្យមក្នុងមួយឯកតាគឺ ៣ លានដុល្លារ។
ក្រៅពីគ្រឿងផ្ទុះយុទ្ធភណ្ឌ សហព័ន្ធរុស្ស៊ីក៏បានចំណាយយ៉ាងច្រើនលើការបើកប្រាក់បៀវត្សរ៍ដល់យោធា ជាមួយនឹងការផ្តល់គ្រាប់រំសេវជាប់ខ្លួន។ គិតជាទឹកប្រាក់សរុបប្រចាំថ្ងៃ រុស្ស៊ីចំណាយប្រហែល ២០០ ដុល្លារសម្រាប់ទាហានម្នាក់។ ដូច្នេះបើគិតការចល័តទ័ពចុងក្រោយបំផុត គឺចំណាយប្រាក់ខែយោធាប្រហែល ២,៧ ពាន់លានដុល្លារ។ ដោយមើលឃើញពីតួលេខទាំងនេះ ទស្សនាវដ្តី Forbes បានដាក់ការសន្និដ្ឋានសម្រាប់ឆ្នាំក្រោយ វិក្កយបត្រសម្រាប់សង្គ្រាមអាចនឹងកើនឡើងខ្ពស់កប់ពពក៕
ប្រភព៖ THE KYIV INDEPENDENT
ប្រភពរូប៖THE KYIV INDEPENDENT
ប្រែសម្រួល៖សុខ តុលា
