គ្រាប់បាល់ចុងម៉ោង ដែលស៊ុតបញ្ចូលទីដោយកីឡាករ Cody Gakpo និង Davy Klaassen ជួយឱ្យក្រុមពណ៌ទឹកក្រូចហូឡង់ដណ្ដើមបានជ័យជម្នះ ២-០ លើក្រុមសេណេហ្គាល់ ដែលជាជើងឯកទ្វីបអាហ្រ្វិក កាលពីថ្ងៃចន្ទ ខណៈក្រុមដែលរងបរាជ័យ ៣ដង ក្នុងវគ្គផ្ដាច់ព្រ័ត្រកន្លងមក បានវិលត្រឡប់មកកាន់វេទិកា World Cup វិញហើយ។
ដោយក្រុមសេណេហ្គាល់អវត្តមានកីឡាករឆ្នើម Sadio Mane ហើយក្រុមហូឡង់មិនមានខ្សែប្រយុទ្ធដ៏សំខាន់ Memphis Depay ពេលការប្រកួតចាប់ផ្ដើមនោះ គូប្រជែង ក្នុងពូល A សម្រាប់ហ្គេម នាទីក្រុងដូហានេះ មើលទៅទំនងជាបញ្ចប់ជាមួយនឹងលទ្ធផលស្មើគ្នា ដោយមិនមានគ្រាប់បាល់ច្រើនជាង។
ប៉ុន្តែនៅសល់តែ ៦នាទីទៀតប៉ុណ្ណោះ ខ្សែប្រយុទ្ធ Gakpo របស់ក្លិប PSV Eindhoven បានរត់ទៅឈរពីមុខអ្នកចាំទីសញ្ជាតិ Edouard Mendy របស់ក្រុមសេណេហ្គាល់ ដើម្បីតែតបញ្ចូលទីពីការបញ្ជូនបាល់ចូលមកតំបន់គ្រោះថ្នាក់ដោយកីឡាករ Frenkie de Jong ពីស្លាបខាងឆ្វេង។
កីឡាករបម្រុង Klaassen បានជួយធានានូវជ័យជម្នះដល់ក្រុមហូឡង់ ជាមួយនឹងគ្រាប់បាល់ ក្នុងម៉ោងបន្ថែមមានរបួសយ៉ាងយូរ ពោលគឺនាទីទី៩០+៩ បន្ទាប់ពីមានឱកាសទម្លុះសំណាញ់ទី ក្រោយអ្នកចាំទី Mendy បានរារាំងការស៊ុតរបស់កីឡាករ Depay ដែលបានចូលលេងក្នុងនាមជាកីឡាករបម្រុងដែរ។
លោក Van Gaal ដែលកំពុងស្ថិតក្នុងដំណាក់កាលទី៣ ក្នុងនាមជាគ្រូបង្វឹករបស់ក្រុមជម្រើសជាតិ បានមានប្រសាសន៍ថា៖ «ខ្ញុំតែងតែមានអារម្មណ៍ថា យើងនឹងរកគ្រាប់បាល់បាន។ វាជាការឈ្នះប្រកបដោយប្រសិទ្ធភាព ប៉ុន្តែខ្ញុំក៏គិតថា យើងល្អជាងដែរ។ ដូច្នេះ ខ្ញុំគិតថាវាជាការទទួលបានជ័យជម្នះដ៏ល្អស័ក្តិសមមួយ បើទោះបីជាខ្ញុំមិនគិតថា វាជាការប្រកួតដ៏ល្អមើលពីការលេងរបស់យើងក៏ដោយ»។
លទ្ធផលនេះ នាំឱ្យក្រុមហូឡង់ឈរទីកំពូល ក្នុងពូលជាមួយក្រុមអេក្វាទ័រ ដែលបានយកឈ្នះក្រុមម្ចាស់ផ្ទះកាតា ២-០ ពីការប្រកួតបើកឆាកនៃព្រឹត្តិការណ៍នេះ កាលពីថ្ងៃអាទិត្យ ហើយក្រុមរបស់លោក Van Gaal ត្រូវតទល់ជាមួយក្រុមមកពីតំបន់អាមេរិកឡាទីន នៅថ្ងៃសុក្រ ខណៈក្រុមសេណេហ្គាល់ នាពេលនេះ ត្រូវប្រឈមនឹងការប្រកួត ដែលត្រូវតែឈ្នះក្រុមកាតា៕