ដោយសារមានជំងឺតិចតួច ទើបនាំឱ្យកីឡាករ Kaoru Mitoma របស់ក្រុមជម្រើសជាតិជប៉ុន ធ្វើដំណើរតៅដល់ប្រទេសកាតារាងយឺត ប៉ុន្តែខ្សែបម្រើស្លាបរូបនេះ បានទទូច កាលពីថ្ងៃអាទិត្យថា រូបគេនឹងត្រៀមខ្លួនរួចរាល់ ១០០ភាគរយ សម្រាប់ការប្រកួតបើកឆាករបស់ក្រុមសាមូរ៉ៃទល់នឹងក្រុមអាល្លឺម៉ង់ ក្នុងព្រឹត្តិការណ៍ World Cup 2022។
កីឡាករវ័យ ២៥ឆ្នាំរូបនេះ បានបង្ហាញពីទេពកោសល្យរបស់ខ្លួន នៅឯក្របខ័ណ្ឌ Premier League ចាប់តាំងពីបានចូលរួមជាមួយក្រុម Brighton នារដូវក្តៅ ដោយការរត់មិនចេះហត់ និងការស៊ុតបញ្ចូលទី ពេលលេងទល់នឹងក្រុម Wolves និង Arsenal។
រូបគេក៏បានបង្ហាញពីគុណប្រយោជន៍ សម្រាប់ប្រទេសជាតិរបស់ខ្លួនផងដែរ ដោយបានទម្លុះសំណាញ់ទីនូវគ្រាប់បាល់ជ័យជម្នះទាំង ២គ្រាប់លើក្រុមអូស្ត្រាលី កាលពីខែមីនា ដើម្បីជួយឱ្យក្រុមជប៉ុនដណ្ដើមបានកៅអីមួយ នៅ World Cup ៧លើកជាប់ៗគ្នា។
កីឡាករ Mitoma បានធ្លាក់ខ្លួនគ្រុនភ្លាមៗ មុនពេលរូបគេត្រូវចូលរួមជាមួយក្រុមជម្រើសជាតិជប៉ុន ដែលបង្ខំឱ្យរូបគេចំណាយពេល ៥ថ្ងៃ នៅលើគ្រែ និងពន្យារពេលការធ្វើដំណើរ។ តែរូបគេបានត្រឡប់មកហ្វឹកហាត់វិញហើយ បន្ទាប់ពីហោះហើរទៅដល់កាតាក្រោយគេ ហើយជាមួយគ្នានេះ រូបគេបានទទូចថា រូបគេនឹងត្រៀមខ្លួន សម្រាប់ការប្រកួតបើកឆាក ក្នុងពូល E របស់ជប៉ុនទល់នឹងអាល្លឺម៉ង់ នាថ្ងៃពុធនេះ។
កីឡាករ Mitoma បាននិយាយថា៖ «ខ្ញុំមិនសូវបានលេងច្រើនទេ ដូច្នេះវាពិបាកក្នុងការនិយាយថា ខ្ញុំនឹងមានទម្រង់យ៉ាងម៉េច ប៉ុន្តែខ្ញុំមិនគិតថា វានឹងមានបញ្ហានោះទេ។ ខ្ញុំគិតថា ខ្ញុំនឹងល្អប្រសើរឡើងវិញ ១០០ភាគរយ ក្នុងហ្គេម ទល់នឹងក្រុមអាល្លឺម៉ង់»។
សម្រាប់ក្រុមជប៉ុន ក្រៅពីប៉ះក្រុមយក្សអាល្លឺម៉ង់ ពួកគេត្រូវប្រឈមជាមួយក្រុមខ្លាំង ២ផ្សេតទៀត គឺអេស្ប៉ាញ និងកូស្តារីការ សម្រាប់ការប្រកួត ក្នុងវគ្គសន្សំពិន្ទុតាមពូលនេះ៕