រដ្ឋាភិបាលរុស្ស៊ីបានចោទប្រកាន់អ៊ុយក្រែនពីបទប្រហារជីវិតទាហានខ្លួនចំនួន ១០នាក់ ដែលបានសុំចុះចាញ់នៅក្នុងសង្រ្គាម ដោយបានដាក់ពាក្យប្តឹងឲ្យមានការស៊ើបអង្កេតជាអន្តរជាតិ។
![](https://cambodiaflashnews.com/wp-content/uploads/2021/06/top-banner.gif)
នៅក្នុងរបាយការណ៍ចុងក្រោយរបស់ក្រសួងការពារជាតិរុស្ស៊ីកាលពីថ្ងៃសុក្រ ទី១៨ ខែវិច្ឆិកា ឆ្នាំ២០២២ បានសបង្ហាញការចោទប្រកាន់ថា ទាហានរុស្ស៊ី១០នាក់ត្រូវបានសម្លាប់យ៉ាងព្រៃផ្សៃដោយភាគីអ៊ុយក្រែន ទោះបីជាទាហានទាំងនោះបានប្រកាសចុះចាញ់ហើយក៏ដោយ។ ក្រសួងបាននិយាយដោយក្តីឈឺចាប់ថា “គ្មាននរណាម្នាក់នឹងអាចលាបពណ៌ ឬកែប្រែការសម្លាប់ដោយចេតនាលើទាហានរុស្ស៊ីជាង ១០ នាក់ដែលត្រូវចាប់បាននោះទេ”។ “វាជាឧក្រិដ្ឋកម្មសង្រ្គាមមួយដែលធ្វើឡើងដោយទីក្រុងកៀវយ៉ាងពិតប្រាកដ”។ ក្រសួងក៏បានបង្ហាញខ្សែអាត់វីដេអូជាភ័ស្តុតាងផងដែរ។
យោងតាមក្រុមប្រឹក្សាសិទ្ធិមនុស្សរបស់រុស្ស៊ី ការប្រហារជីវិតដែលត្រូវបានចោទប្រកាន់នេះ បានធ្វើឡើងនៅភូមិ Makiivka ស្ថិតក្នុងតំបន់ Lugansk ភាគខាងកើតនៃប្រទេសអ៊ុយក្រែន ខណៈដែលកងទ័ពអ៊ុយក្រែនបាននិយាយថា ពួកគេបានដណ្តើមយកមកវិញក្នុងសប្តាហ៍នេះ។ ប្រធានក្រុមប្រឹក្សាសិទ្ធិមនុស្សរុស្ស៊ី លោក Valeriy Fadeyev បានពោលថា “យើងនឹងស្នើសុំឱ្យមានប្រតិកម្ម និងការស៊ើបអង្កេតពីសហគមន៍អន្តរជាតិ”។
ឆ្លើយតបភ្លាមៗ អ្នកនាំពាក្យអង្គការសហប្រជាជាតិបានប្រាប់ទីភ្នាក់ងារសារព័ត៌មាន AFP យ៉ាងដូច្នេះថា “យើងដឹងអំពីវីដេអូនេះហើយ ហើយយើងកំពុងពិនិត្យមើលវីដេអូទាំងនោះ”។ សំណុំរឿងកំពុងស្ថិតក្នុងដំណើរការពិចារណា។ ដោយឡែកអ៊ុយក្រែនផ្ទាល់វិញមិនបានចេញការបកស្រាយអ្វីនោះទេ៕
ប្រភព៖ AFP
ប្រភពរូប៖AFP
ប្រែសម្រួល៖សុខ តុលា