ទន្ទឹមនឹងមានការភ័យខ្លាចថាអ៊ុយក្រែននឹងវាយបកហួសទៅរំដោះឧបទ្វីបគ្រីមៀរយកទៅវិញ រដ្ឋាភិបាលរុស្ស៊ីបានដាក់ចេញនូវបញ្ជាពង្រឹងការការពារយ៉ាងខ្លាំងជាទីបំផុត។
លោក Sergei Aksyonov អភិបាលតំបន់គ្រីមៀរដែលតែងតាំងដោយរុស្ស៊ីបាននិយាយកាលពីថ្មីៗនេះថា “ការងារពង្រឹងកំពុងត្រូវបានអនុវត្តនៅលើទឹកដីទូទាំងគ្រីមៀរ ក្រោមការគ្រប់គ្រងរបស់ខ្ញុំ ក្នុងគោលបំណងដើម្បីធានាសន្តិសុខរបស់ប្រជាជនគ្រីមៀរទាំងអស់”។ “ប្រតិបត្តិការការពារត្រូវបានរឹតបន្តឹងខ្លាំង ការពារខ្លាំងនៅតាមព្រំដែនជាមួយតំបន់ឃើសនអ៊ុយក្រែនដែលកងកម្លាំងរុស្ស៊ីទើបបានបន្លាស់ទីចេញ”។
យោងតាមការប្តេជ្ញារបស់ប្រធានាធិបតីអ៊ុយក្រែនកាលពីពេលកន្លងទៅ អ៊ុយក្រែននឹងរំដោះយកមកវិញនូវទឹកដីរបស់ខ្លួនពីរុស្ស៊ីទាំងចាស់ទាំងថ្មី រួមទាំងគ្រីមៀរផងដែរ។
គួររំលឹកថា តំបន់គ្រីមៀរត្រូវបានរុស្ស៊ីបានដាក់បញ្ចូលតាំងពីឆ្នាំ ២០១៤មកម្ល៉េះ បន្ទាប់ពីមានបាតុកម្មគាំទ្រលទ្ធិប្រជាធិបតេយ្យទូទាំងតំបន់ ដែលឈានដល់ការដកតំណែងអតីតប្រធានាធិបតីអ៊ុយក្រែនដែលជាមិត្តរបស់វិមានក្រឹមឡាំង។ ចលនានេះក្រោយមកត្រូវបានគេប្រើជាគំរូក្នុងព្រឹត្តិការណ៍ខែកុម្ភៈ គឺប្រតិបត្តិការយោធាពិសេសរបស់រុស្ស៊ីនៅអ៊ុយក្រែនតែម្តង៕
ប្រភព៖ AFP
ប្រភពរូប៖AFP
ប្រែសម្រួល៖សុខ តុលា
