ខ្សែប្រយុទ្ធ Sadio Mane របស់ជម្រើសជាតិសេណេហ្គាល់ ត្រូវបានដកឈ្មោះចេញពីការប្រកួតប្រជែង ក្នុងព្រឹត្តិការណ៍ World Cup នៅប្រទេសកាតា ដែលនេះជាការប៉ះទង្គិចយ៉ាងខ្លាំងដល់ឱកាសនៃក្រុមរបស់គេ បន្ទាប់ពីមន្ត្រីសហព័ន្ធបាល់ទាត់ជាតិ បានបញ្ជាក់កាលពីថ្ងៃព្រហស្បតិ៍ថា រូបគេនឹងត្រូវវះកាត់របួសជើង ក្នុងពេលដែលការប្រកួតប្រជែង ដំណើរការ
Mane មានភាពមិនច្បាស់លាស់ សម្រាប់ក្រុមអាហ្វ្រិកខាងលិច បន្ទាប់ពីមានរបួសកំភួនជើងផ្នែកខាងស្ដាំ ពេលលេងការប្រកួតឱ្យក្លិប Bayern Munich របស់ប្រទេសអាល្លឺម៉ង់។
គ្រូពេទ្យប្រចាំក្រុមសេណេហ្គាល់លោក Manuel Afonso បានប្រាប់អ្នកសារព័ត៌មានថា៖ «ជាសំណាងមិនល្អថ្ងៃនេះ (ថ្ងៃព្រហស្បតិ៍) MRI (ការថតស្កេនតាមម៉ាស៊ីនវេជ្ជសាស្ត្រ) បង្ហាញយើងថា ការជាសះស្បើយឡើងវិញ មិនមានអំណោយផលដូចដែលយើងបានរំពឹងទុកទេ ហើយជារឿងគួរសោកស្ដាយ យើងសម្រេចប្រកាសដកឈ្មោះកីឡាករ Sadio (Mane) ពី World Cup»។
ខ្សែប្រយុទ្ធរូបនេះមានសារៈសំខាន់ ចំពោះភាពជោគជ័យនាពេលថ្មីៗនេះរបស់សេណេហ្គាល់ ដែលត្រូវបានគេចាត់ទុកថា ជាក្តីសង្ឃឹមដ៏ខ្ពស់បំផុតរបស់ទ្វីបអាហ្រ្វិក ក្នុងការប្រកួតប្រជែង នៅ World Cup នេះ។ អវត្តមានរបស់គេ នឹងក្លាយជាផលប៉ះពាល់ដ៏ធំ ចំពោះឱកាសរបស់ពួកគេ ក្នុងការបានឆ្លងឱ្យផុតពីការប្រកួត ក្នុងពូល A ដែលពួកគេត្រូវជួបជាមួយក្រុមហូឡង់ នៅថ្ងៃចន្ទ មុនពេលប៉ះជាមួយប្រទេសម្ចាស់ផ្ទះកាតា និងអេក្វាទ័រជាបន្តបន្ទាប់។
Mane បានក្លាយជាកីឡាករឆ្នើមរបស់ក្រុម ដោយបានស៊ុតបាល់ប៉េណាល់ទីគ្រាប់ជ័យជម្នះ ក្នុងវគ្គផ្តាច់ព្រ័ត្រ នៅឯកម្មវិធី Africa Cup of Nations នាប្រទេសកាមេរូន កាលពីខែកុម្ភៈ និង ៦សប្តាហ៍ក្រោយមក ជួយធានាសិទ្ធិមក World Cup ក្នុងវគ្គជម្រុះ។ ក្នុងពេលវេលាទាំង ២លើកនោះ ពួកគេសុទ្ធតែបានទម្លាក់ក្រុមអេហ្ស៊ីប ដោយបាល់ប៉េណាល់ទីកាត់ក្ដីរាល់លើក។
កីឡាករ Mane វ័យ ៣០ឆ្នាំ បានជាប់ជាកីឡាករបាល់ទាត់ឆ្នើមជាងគេប្រចាំឆ្នាំរបស់ទ្វីបអាហ្វ្រិកចំនួន ២ដង៕