សហព័ន្ធបាល់ទាត់អាហ្សង់ទីន (AFA) បានឱ្យដឹង កាលពីថ្ងៃព្រហស្បតិ៍ម្សិលមិញថា កីឡាករ Joaquin Correa និង Nicolas Gonzalez ត្រូវបានដកចេញពីក្រុមជម្រើសជាតិ សម្រាប់ការប្រកួតប្រជែង ក្នុងព្រឹត្តិការណ៍ World Cup ដោយសារតែរបួស។
ជាមួយគ្នានេះ AFA បានប្រាប់ថា កីឡាករ Angel Correa ត្រូវបានកោះហៅឱ្យមកជំនួសកីឡាករ Gonzalez ដែលមានរបួសសាច់ដុំ។
AFA បានប្រកាសនៅក្នុងសេចក្តីថ្លែងការណ៍របស់ខ្លួនថា៖ «បន្ទាប់ពីមានការហ្វឹកហ្វឺនថ្ងៃនេះ (ថ្ងៃព្រហស្បតិ៍) កីឡាករ Nicolas Gonzalez បានរងរបួសសាច់ដុំ ហើយនឹងមិនត្រូវបានដាក់បញ្ចូលក្នុងក្រុមជម្រើសជាតិ ក្នុងព្រឹត្តិការណ៍បាល់ទាត់ពិភពលោកទេ។ កីឡាករ Angel Correa ត្រូវបានកោះហៅ ដើម្បីមកជំនួសកន្លែងរបស់កីឡាករ Gonzalez»។
«កីឡាករ Joaquin Correa ក៏នឹងត្រូវដកចេញពីក្រុម នៅ World Cup នេះ ដោយសារមានរបួសដែរ។ កីឡាករ ដែលត្រូវមកជំនួស នឹងត្រូវជូនដំណឹងនៅប៉ុន្មានម៉ោងខាងមុខនេះ»។ សេចក្ដីប្រកាសរបស់ AFA បានបន្ថែម។
ការប្រកួតបើកឆាក នៅ World Cup របស់ក្រុមអាហ្សង់ទីន ត្រូវប៉ះជាមួយក្រុមអារ៉ាប៊ីសាអ៊ូឌីត នៅថ្ងៃទី២២ ខែវិច្ឆិកា ខណៈដែលក្រុមម្ចាស់ជើងឯកនៃកម្មវិធី Copa America របស់ទ្វីបអាមេរិកឡាទីន ក៏កំពុងមិនស្រណុកចិត្តនឹងភាពរឹងមាំឡើងវិញរបស់ខ្សែការពារ Christian Romero ក៏ដូចជាខ្សែប្រយុទ្ធទាំង ២ Alejandro Gomez និង Paulo Dybala ដែលពួកគេទាំង ៣នាក់ សុទ្ធតែអវត្តមាន ក្នុងការប្រកួតកម្ដៅសាច់ដុំចុងក្រោយរបស់អាហ្សង់ទីន កាលពីថ្ងៃពុធ៕