ភ្នំពេញ៖ពិតជាមោទកភាពជាតិណាស់ ដែលអង្កររបស់កម្ពុជាបានឈ្នះជ័យលាភីជា «អង្ករល្អដាច់គេ»របស់ពិភពលោកប្រចាំឆ្នាំ២០២២ក្នុងវេទិកាសន្និសីទអង្ករពិភពលោកដែលធ្វើឡើងនៅខេត្តភូកេត ប្រទេសថៃ នាថ្ងៃទី១៧ ខែវិច្ឆិកា ឆ្នាំ២០២២។នេះបើតាមការឱ្យដឹងរបស់លោក សុង សារ៉ន ប្រធានសហព័ន្ធស្រូវអង្ករកម្ពុជា។
![](https://cambodiaflashnews.com/wp-content/uploads/2021/06/top-banner.gif)
លោក សុង សារ៉ន បានបន្តថា នេះជាឆ្នាំទី៥ហើយដែលអង្កររបស់កម្ពុជាទទួលបានជ័យលាភីនេះ ក្នុងនោះគឺនៅឆ្នាំ២០១២ ឆ្នាំ២០១៣ ឆ្នាំ២០១៤ ឆ្នាំ២០១៨ និងចុងក្រោយនៅឆ្នាំ២០២២នេះទៀតដែរ។
ប្រធានសហព័ន្ធស្រូវអង្ករ បានសូមអគុណដល់ក្រុមការងារសហព័ន្ធស្រូវអង្ករ សមាជិករោងម៉ាស៊ីនកិនស្រូវ សហគមន៍កសិកម្ម ក្រសួងកសិកម្ម ក្រសួងពាណិជ្ជកម្ម ដែលផ្តល់គាំទ្រផលិតអង្ករល្អដាច់គេ ដើម្បីចួលរួមប្រកួត និងនាំពានរង្វាន់មកកម្ពុជា៕
ជាមួយគ្នានេះដែរ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទបានថ្លែងសារ អបអរសាទរយ៉ាងក្លៀវក្លា ចំពោះអង្ករកម្ពុជាពូជ “ផ្ការំដួល” ដែលទទួលបានជ័យលាភីលេខ១ ជាអង្ករល្អដាច់គេ លំដាប់ថ្នាក់ពិភពលោក។
លោកបានបញ្ជាក់ថានេះគឺជាលើកទី៥ហើយ ដែលអង្ករកម្ពុជាបានទទួលជ័យលាភីនេះ និងនាំមកនូវមោទនភាពសម្រាប់កម្ពុជា។
លោករដ្ឋមន្ត្រី បានលើកឡើងថា៖ជ័យលាភីនេះនឹងបង្កើនកេរ្តិ៍ឈ្មោះអង្ករកម្ពុជាបន្ថែមទៀតនៅលើឆាកអន្តរជាតិខណៈដែលការនាំចេញអង្ករទៅកាន់ទីផ្សារអន្តរជាតិសម្រាប់រយៈពេល ១០ខែ កើនបាន១០,៦៧% ដែលមានបរិមាណសរុបចំនួន ៥០៩.២៤៩ តោន ហើយគិតជាទឹកប្រាក់មានចំនួន ៣២៣,៩០ លានដុល្លារ៕