កំពង់ឆ្នាំង៖កម្លាំងអាជ្ញាធរបានចុះបង្ក្រាបឧបករណ៍ល្មើសនេសាទប្រភេទរបាំងស្បៃមុងជាច្រើនក្នុងភូមិចំនួន៣ និងយកទៅកម្ទេចចោល។
មន្ត្រីចុះប្រតិបត្តិការបានឱ្យដឹងនៅព្រឹកទី១៨ ខែវិច្ឆិកានេះថា កម្លាំងនគរបាលស្រុកជលគិរី សហការជាមួយគណៈបញ្ជាការឯកភាពស្រុកកម្លាំងជាង១០នាក់ មធ្យោបាយកាណូត៣គ្រឿង បានចុះបង្ក្រាបឧបករណ៍ល្មើសនេសាទប្រភេទរបាំងស្បៃមុងនៅម្តុំស្វាស្លាប់បឹងផុក ភូមិអង្គជ្រុំ ភូមិអន្លង់អក ភូមិបឹងឆកឫស្សី ស្ថិតក្នុងឃុំកោះថ្កូវ និងឃុំជលសា ស្រុកជលគិរី ខេត្តកំពង់ឆ្នាំង។
ក្នុងការបង្ក្រាបនោះ ជាលទ្ធផលកម្លាំងសមត្ថកិច្ចបានរុះរើរបាំងស្បៃមុងចំនួន២៤កន្លែងមានប្រវែង១.២០០ម៉ែត្រ លបលូស្បៃមុង២៤លប បង្គោល២៥០ដើមនិងចាក់លែងកូនត្រីជិត២០០គីឡូក្រាមចូលបឹងធម្មជាតិវិញ។ចំពោះឧបករណ៍សម្ភារល្មើសនេសាទបានរឹបអូសនិងយកកម្ទេចចោល៕ដោយ៖វិចិត្រ
