ខ្សែប្រយុទ្ធ Cristiano Ronaldo របស់ក្លិប Manchester United បាននិយាយថា រូបគេជិតនឹងបានចុះហត្ថលេខាជាមួយក្លិបគូប្រជែងស្លាប់រស់ Manchester City កាលពីឆ្នាំមុនទៅហើយ ប៉ុន្តែអតីតអ្នកចាត់ការ លោក Alex Ferguson បានសុំកុំឱ្យរូបគេធ្វើដូច្នោះ។
![](https://cambodiaflashnews.com/wp-content/uploads/2021/06/top-banner.gif)
កីឡាករ Ronaldo និយាយថា លោក Ferguson បានបញ្ចុះបញ្ចូលរូបគេឱ្យចូលរួមជាមួយក្រុម Man United ម្តងទៀត សម្រាប់ពេលវេលាលើកទី ២ នៅទឹកដី Old Trafford នៅពេលរូបគេផ្ទេរពីក្លិប Juventus ក្នុងខែសីហា ឆ្នាំ២០២១ ជាមួយនឹងកិច្ចសន្យារយៈពេល ២ឆ្នាំ វិលមកកាន់ក្លិប ដែលរូបគេបានឈ្នះពានរង្វាន់ធំៗចំនួន ៨ ចន្លោះឆ្នាំ២០០៣-២០០៩ ។
Ronaldo បានប្រាប់លោក Piers Morgan ក្នុងកម្មវិធីទូរទស្សន៍ TalkTV ថា៖ «និយាយដោយត្រង់ទៅ វាគឺជិតនឹងកើតឡើងហើយ។ វាជាអ្វីដែលពួកគេបាននិយាយច្រើន ហើយអ្នកចាត់ការទូទៅរបស់ក្រុម Manchester City លោក Pep Guardiola បាននិយាយកាលពី ២-៣សប្តាហ៍មុនថា ពួកគេបានព្យាយាមយ៉ាងខ្លាំង ដើម្បីឱ្យខ្ញុំបានចូលរួមជាមួយក្លិប»។
«ប៉ុន្តែដូចដែលអ្នកបានដឹងហើយថា ប្រវត្តិរឿងរ៉ាវរបស់ខ្ញុំ គឺនៅ Manchester United បេះដូង និងអារម្មណ៍ វាធ្វើឱ្យមានភាពខុសប្លែកគ្នា ហើយជាការពិតណាស់ គឺលោក Sir Alex Ferguson ។ ខ្ញុំភ្ញាក់ផ្អើល ប៉ុន្តែវាជាការសម្រេចចិត្តដោយមនសិការ។ ដោយសារតែចិត្តខ្ញុំត្រូវការ ពិតជាត្រូវការខ្លាំងណាស់ ក្នុងពេលនោះ»។
រូបគេបានបន្ថែមថា អន្តរាគមន៍របស់លោក Ferguson បានជួយឱ្យរូបគេសម្រេចចិត្តចូលរួមជាមួយក្លិប Man United ជាលើកទី២។
យ៉ាងណាក្ដី ក្នុងបទសម្ភាសន៍មួយ ដែលបានចេញផ្សាយកាលពីថ្ងៃអាទិត្យ កីឡាករ Ronaldo បាននិយាយថា ក្រុម Man United បានក្បត់រូបគេ ហើយចោទថា រូបគេត្រូវបានបង្ខំឱ្យដើរចេញពីក្លិប។ ក្លិប Man United បានឱ្យដឹងកាលពីថ្ងៃចន្ទថា ពួកគេនឹងដោះស្រាយចំពោះការលើកឡើងរបស់កីឡាករ Ronaldo នេះ៕