ក្រុមជម្រើសជាតិអាហ្សង់ទីន បានធ្វើការប្រកួតសមជើង ដើម្បីត្រៀមសម្រាប់ព្រឹត្តិការណ៍ World Cup ដោយការយកឈ្នះក្រុមអេមីរ៉ាតអារ៉ាប់រួម ក្នុងលទ្ធផល ៥-០ នៅទីក្រុង Abu Dhabi កាលពីថ្ងៃពុធ ខណៈដែលគ្រាប់បាល់ ២គ្រាប់ពីខ្សែប្រយុទ្ធ Angel Di Maria និងម្នាក់ ១គ្រាប់ពីកីឡាករ Julian Alvarez, Lionel Messi និង Joaquin Correa បានបន្លាយដំណើរផ្លូវមិនចាញ់សោះរបស់ក្រុមពពកសដល់ចំនួន ៣៦ហ្គេម។
នៅចំពោះមុខក្រុមអ្នកទស្សនា ក្នុងកីឡដ្ឋាន Mohammad Bin Zayed ក្រុមអាហ្សង់ទីនបានធ្វើការនាំមុខ នៅពេលដែលស៊ុតបភើស្តារ Messi ទទួលបាល់ពីកីឡាករ Di Maria ហើយមានតែអ្នកចាំទីម្នាក់ប៉ុណ្ណោះ ដែលរូបគេត្រូវប្រឈមជាមួយ តែដោយសារមិនមានភាពអាត្មានិយម ក៏បានបញ្ជូនបាល់ឱ្យកីឡាករ Alvarez ទម្លុះសំណាញ់ទី ដែលជាគ្រាប់បាល់អន្តរជាតិទី៣ នៅនាទីទី១៧។
កីឡាករ Di Maria បន្ថែមការនាំមុខឱ្យក្រុមអាហ្សង់ទីន នៅ ៨នាទីក្រោយ ជាមួយនឹងការស៊ុតបាល់ក្នុងលម្ហយ៉ាងអស្ចារ្យ បន្ទាប់ពីកីឡាករ Marcos Acuna បញ្ចូនបាល់ចូលតំបន់គ្រោះថ្នាក់ពីស្លាបខាងឆ្វេង ហើយខ្សែប្រយុទ្ធ ដែលបានប្រឹងជម្នះជាមួយនឹងរបួសសរសៃពួរ កាលពីខែមុន ដើម្បីមានឈ្មោះក្នុងក្រុមរបស់អ្នកចាត់ការ លោក Lionel Scaloni ធ្វើបានសម្រេចគ្រាប់ទី ២ របស់ខ្លួន នៅនាទីទី៣៦។
កីឡាករ Messi បានចូលរួមចំណែកក្នុងភាពរីករាយនេះ នៅ ១នាទីមុនចប់វគ្គទី១ ដោយការស៊ុតបាល់បាល់តម្រង់ជ្រុង ៩០ដឺក្រេយ៉ាងស្អាត ហើយកីឡាករបម្រុង Correa បង្ហើយគ្រាប់ចុងក្រោយ នៅនាទីទី៦០ ខណៈដែលអតីតក្រុមជើងឯក World Cup ២ដង បង្ហាញភាពរឹងមាំរបស់ខ្លួន មុនព្រឹត្តិការណ៍ដ៏ធំ កើតឡើង នៅ ៣ថ្ងៃខាងមុខ។
ក្រុមអាហ្សង់ទីន ដែលនឹងត្រឡប់ទៅប្រទេសកាតាវិញ នៅថ្ងៃព្រហស្បតិ៍នេះ ត្រូវប៉ះជាមួយក្រុមអារ៉ាប៊ីសាអូឌីត ក្នុងការប្រកួតបើកឆាករបស់ពួកគេ នៅថ្ងៃទី២២ ខែវិច្ឆិកា មុនពេលប្រកួតតទល់ជាមួយក្រុមម៉ិកស៊ិក និងប៉ូឡូញជាបន្តបន្ទាប់ ក្នុងពូល C៕