កំពត៖រយ:ពេល១០ខែនៃឆ្នាំ២០២២ភ្ញៀវទេសចរប្រមាណជាង១លាន៥សែននាក់បានចូលមកលម្ហែកម្សាន្តនិងស្នាក់អាស្រ័យក្នុងខេត្ត កំពត។ជាក្តីរំពឹងបរិមាណភ្ញៀវនឹងបន្តកើនឡើងដែលអាចប្រហាក់ប្រហែល ឬច្រើនជាងពេលមិនទាន់មានវិបត្តិកូវីដ-១៩។ នេះជាការបញ្ជាក់របស់មន្ត្រីនៃមន្ទីរទេសចរណ៍ខេត្តកំពត។
![](https://cambodiaflashnews.com/wp-content/uploads/2021/06/top-banner.gif)
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់ឲ្យដឹងថា ក្រោយពេលបើកប្រទេសឡើងវិញ ចំនួនភ្ញៀវទេសចរចូល មកខេត្តកំពតចាប់ផ្តើមកើនឡើងជាបន្តបន្ទាប់។ រយៈពេល១០ខែក្នុងឆ្នាំ២០២២កន្លងទៅនេះ ខេត្តកំពតបានទទួលភ្ញៀវជាតិ និងអន្តរជាតិចំនួន១.៥៣៣.៩៤០នាក់។តួលេខនេះបានកើនឡើង១០៧,១៧ភាគរយបើប្រៀបធៀបនឹងរយៈពេលដូចគ្នាកាលពីឆ្នាំ២០២១ដែលមានភ្ញៀវចំនួន៧៤០.៣៩៥នាក់។ក្នុងនោះភ្ញៀវជាតិមាន១.៤៩៤.២០២នាក់ និងទេសចរបរទេសចំនូន៣៩.៧៣៨នាក់។
លោកប្រធានមន្ទីរបានព្យាករថាចំនួនភ្ញៀវនឹងបន្តកើនឡើងដោយសារកិច្ចប្រឹងប្រែងអភិវឌ្ឍន៍ពីសំណាក់រាជរដ្ឋាភិបាលផ្អែកលើកត្តាសុខ សន្តិភាពដែលនាំមកនូវភាពសុខដុមរម្យនាជូនប្រជាពលរដ្ឋ ក៏ដូចជាការខិតខំរបស់ក្រសួងទេសចរណ៍ក្នុងការផ្សព្វផ្សាយសមិទ្ធផលទាំងឡាយឆ្ពោះទៅកាន់ឆាកអន្តរជាតិពិសេសតាមរយៈការរៀបចំកិច្ចប្រជុំកំពូលអាស៊ានដែលកម្ពុជាធ្វើម្ចាស់ផ្ទះនោះ។
លោក គឹម សាន អ្នកគ្រប់គ្រង់ទូទៅនៃម៉ូលីរីស៊ត មានទីតាំងក្នុងក្រុងកំពត បានប្រាប់ឲ្យដឹងថា¶ចាប់តាំងពីបើកដំណើរការសេដ្ឋកិច្ចប្រទេស ឡើងវិញចំនួនភ្ញៀវមានការកើនឡើង ពោលគឺបានវិលត្រឡប់មករកប្រក្រតីភាពដូចមុន។ លោកសង្ឃឹមថាចំនួនភ្ញៀវទេសចរនឹងបន្តកើនឡើងទ្វេដងនៅឆ្នាំ២០២៣ ព្រោះស្ថានភាពកូវីដ-១៩ មានភាពល្អប្រសើរ ខណ:សមិទ្ធផលទេសចរណ៍ក្នុងខេត្តក៏ចាប់ផ្តើមបើកដំណើរការផ្សព្វផ្សាយបានទូលំទូលាយ។
សូមបញ្ជាក់ថាភ្ញៀវទេសចរដែលបានចូលមកកម្សាន្តក្នុងខេត្តកំពតកាលពីឆ្នាំ២០១៨មានជាង១.៦២០.០០០នាក់ និងឆ្នាំ២០១៩ ប្រមាណជាង១.៦៦០.០០០នាក់៕