ភ្នំពេញ៖ម្ចាស់សហគ្រាស នាយក និងបណ្ណាធិការ ត្រូវបំពេញកាតព្វកិច្ចនូវការដាក់តាំង ឬព្យួរបង្ហាញឯកសារបញ្ជាក់ការចុះបញ្ជីពន្ធដារ ដែលមានសុពលភាព នៅកន្លែងធ្វើសកម្មភាពសេដ្ឋកិច្ចនីមួយៗ។ អ្នកដែលមិនអនុវត្តតាមណែនាំនេះ នឹងត្រូវរងទោសទណ្ឌ។នេះជា ការបញ្ជាក់របស់លោក គង់ វិបុលរដ្ឋមន្ត្រីប្រតិភូអមនាយករដ្ឋមន្ត្រី ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ។
លោក គង់ វិបុល បានបន្តថា វិញ្ញបនបត្រចុះបញ្ជីពន្ធដារ ឬលិខិតបញ្ជាក់ពីការចុះបញ្ជីពន្ធដារ និងប័ណ្ណពន្ធប៉ាតង់ ត្រូវដាក់តាំងនៅទីចាត់ការសហគ្រាស។ ចំពោះសាខាសហគ្រាស ក៏ត្រូវតាំងបង្ហាញលិខិតទាំងនេះដែរ។
បើតាមលោក គង់ វិបុល ការធ្វើបែបនេះគឺមានគោលគ្រប់គ្រងការប្រមូលពន្ធប៉ាតង់ និងការបញ្ជាក់អំពីសិទ្ធិនិងកាតព្វកិច្ចជាភ្នាក់ងារកាត់ទុកនិងប្រមូលអាករលើតម្លៃបន្ថែម(VAT) ពីអតិថិជន សម្រាប់ប្រកាសបង់ពន្ធមករដ្ឋបាលសារពើពន្ធ។ លោក បានបន្ថែមថា ចំពោះអ្នកមិនអនុវត្តមានសសេចក្តីណែនាំនេះទេនឹងត្រូវចាត់ទុកថាប្រព្រឹត្តអំពើរាំងស្ទះដល់ការអនុវត្តបទបញ្ញត្តិស្តីពីពន្ធដារ និងត្រូវទទួលរងទោស ទណ្ឌស្រមតាមមាត្រា ១៣៣ នៃច្បាប់ស្តីពីសារពើពន្ធ៕ដោយ សិរីមតី
