មេដឹកនាំអង្គការណាតូ លោក Jens Stoltenberg បានគូសបញ្ជាក់ក្នុងរបាយការណ៍បឋមជុំវិញមីស៊ីលដែលបានធ្លាក់លើទឹកដីប៉ូឡូញ ថាមិនមែនជាកំហុសអ៊ុយក្រែនទេ។
នៅក្នុងរបាយការណ៍បឋមក្រោយការស៊ើបអង្កេតយ៉ាងហ្មត់ចត់ដោយប្រទេសណាតូ ក៏ដូចជាសម្ព័ន្ធមិត្តលោកខាងលិចជាច្រើនទៀតចាប់តាំងពីថ្ងៃពុធ ទី១៦ ខែវិច្ឆិកា ឆ្នាំ២០២២ លទ្ធផលត្រូវបានលាតត្រដាងថា មីស៊ីលរុស្ស៊ីដែលបានធ្លាក់ចំភូមិមួយភាគខាងកើតទឹកដីប៉ូឡូញជាប់នឹងអ៊ុយក្រែនសម្លាប់មនុស្ស២នាក់នោះ គឺទំនងជាត្រូវបានបាញ់ដោយប្រព័ន្ធការពារដែនអាកាសអ៊ុយក្រែនក្នុងអំឡុងបាញ់ទប់កាំជ្រួចប្រឆាំងនាវារុស្ស៊ី។ ថ្លែងទៅកាន់អ្នកសារព័ត៌មានថ្ងៃដដែល លោក Stoltenberg បាននិយាយបែបនេះ។ លោកបានបន្តថា៖ “យើងមិនបន្ទោសអ៊ុយក្រែនទេ នេះមិនមែនជាកំហុសរបស់អ៊ុយក្រែនឡើយ។ “រុស្ស៊ីទៅវិញទេដែលត្រូវទទួលខុសត្រូវខ្ពស់បំផុត ព្រោះខ្លួនបានបន្តសង្គ្រាមខុសច្បាប់ប្រឆាំងនឹងអ៊ុយក្រែន”។
យ៉ាងណាក៏ដោយ ប្រធានាធិបតីអ៊ុយក្រែន លោកហ្សេឡិនស្គីបានច្រានចោលយ៉ាងដាច់អហង្ការចំពោះព័ត៌មាននេះ។ លោកស្គីថា លោកជឿជាក់យ៉ាងច្បាស់ដោយផ្អែកលើរបាយការណ៍កងកម្លាំងអ៊ុយក្រែនផ្តល់ឲ្យជារៀងរាល់ម៉ោង មីស៊ីលនោះមិនមែនចេញពីខាងអ៊ុយក្រែនទេ។ អ៊ុយក្រែនគួរត្រូវបានផ្តល់សិទ្ធិឲ្យចូលទៅកាន់កន្លែងកើតហេតុនោះយូរមកហើយ។ ជាចុងក្រោយ លោកស្គីសុំសិទ្ធិភាគីពាក់ព័ន្ធដើម្បីចូលទៅស៊ើបអង្កេតដោយខ្លួនឯង៕
ប្រភព៖ SKYNEWS
ប្រភពរូប៖SKYNEWS
ប្រែសម្រួល៖សុខ តុលា
