ភ្នំពេញ៖ជនបរទេសម្នាក់បានបើករថយន្តម៉ាក Nissan Frontier បុកជាមួយម៉ូតូហុងដាឌ្រីម ក្នុងទិសដៅបញ្ច្រាសគ្នាពេញទំហឹង បណ្ដាលឱ្យបុរសខាងម៉ូតូរងរបួសធ្ងន់។គ្រោះថ្នាក់ចរាចរនេះបានកើតឡើងនៅតាមផ្លូវលេខ៦០៨ ក្នុងសង្កាត់បឹងកក់ទី១ ខណ្ឌទួលគោក កាលពីរំលងអធ្រាត្រឈានចូលថ្ងៃទី១៧ ខែវិច្ឆិកា។
សាក្សីបានឱ្យដឹងថា មុនកើតហេតុមានបុរសម្នាក់ជិះម៉ូតូម៉ាកហុងដាឌ្រីម ផ្លាកលេខកំពង់ចាម 1K-6127 តាមផ្លូវលេខ៦០៨ ពីកើតទៅលិចក្នុងល្បឿនលឿន។
មកដល់កន្លែងខាងលើ ស្រាប់តែមានរថយន្តម៉ាក Nissan Frontier ផ្លាកលេខភ្នំពេញ 2AX-8904 បើកបរដោយជនជាតិបរទេសម្នាក់ទិសដៅបញ្ច្រាសគ្នាមានល្បឿនលឿន។រថយន្តបានចូលគន្លងផ្លូវម៉ូតូក៏បុកពេញទំហឹង បណ្ដាលឱ្យខាងម៉ូតូរងរបួសធ្ងន់និងរថយន្ត-ម៉ូតូ ខូចខាតយ៉ាងដំណំ។
បន្ទាប់ពីកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះមកវាស់វែង ហើយយករថយន្តនិងម៉ូតូទៅរក្សាទុកដើម្បីរង់ចាំដោះស្រាយតាមនីតិវិធី៕ដោយ៖វិចិត្រ
