ភ្នំពេញៈក្នុងរយៈពេល១០ខែឆ្នាំ២០២២ កម្ពុជាបាននាំចូលដែកនិងដែកថែប ពីក្រៅប្រទេសមកបំពេញតម្រូវការក្នុងស្រុកដែលមានតម្លៃជាង៣០១លានដុល្លារ។កំណើននៃការនាំចូលសម្ភារៈពីដែក និងដែកថែបនេះ បង្ហាញពីតម្រូវការក្នុងស្រុកលើការអភិវឌ្ឍគម្រោងសំណង់នានា និងជាការត្រៀមខ្លួន សម្រាប់ការផ្គត់ផ្គង់នៅក្នុងឆ្នាំ២០២៣ខាងមុខ។
យោងតាមតារាងស្ថិតិទំនិញពាណិជ្ជកម្ម នាំចូលរបស់អគ្គនាយកដ្ឋានគយ និងរដ្ឋាករកម្ពុជា ចេញផ្សាយថ្មីៗនេះ បានឱ្យដឹងថា ក្នុងរយៈពេល១០ខែដើមឆ្នាំ២០២២ ការនាំចូលដែក និងដែកថែប មានទឹកប្រាក់សរុប៣០១,៨៦៨លានដុល្លារ កើន២២,៣ភាគរយបើធៀបនឹងរយៈពេលដូចគ្នា ក្នុងឆ្នាំ២០២១ ដែលមានចំនួន២៤៥,០៨៨លានដុល្លារ។
ទឹកប្រាក់ការនាំចូលដែក និងដែកថែប ស្មើនឹងប្រមាណ១,២ភាគរយនៃការចំណាយសរុបរបស់កម្ពុជា ទៅលើការនាំចូលទំនិញក្នុងរយៈពេល១០ខែ ឆ្នាំ២០២២ ដែលមានតម្លៃសរុបជាង២៥.៨១៧លានដុល្លារអាមេរិក។
ដោយឡែក សម្រាប់ពេញមួយខែតុលា ឆ្នាំ២០២២នេះ ការនាំចូលដែក និងដែកថែបមានតម្លៃ៣០,០៩លានដុល្លារអាមេរិក កើនឡើង៦០,៨ភាគរយ ពី១៨,៧១១លានដុល្លារអាមេរិក បើប្រៀបធៀបនឹងរយៈពេលដូចគ្នាក្នុងឆ្នាំ២០២១៕ដោយ៖សិរីមតី