កំពង់ស្ពឺ៖ស្ត្រី២នាក់ជិះម៉ូតូឌុបគ្នាបានប៉ះជាមួយរថយន្ដបណ្តាលឱ្យដួលខ្ទាតមនុស្សចូលរថយន្ត១គ្រឿងទៀតកិនស្លាប់ម្នាក់ រងរបួសធ្ងន់ម្នាក់។គ្រោះថ្នាក់ចរាចរដ៏រន្ធត់នោះបានកើតឡើងនៅលើផ្លូវលេខ១៣០ ត្រង់ភូមិរំលេច ឃុំរលាំងគ្រើល ស្រុកសំរោងទង ខេត្តកំពង់ស្ពឺ កាលពីព្រឹកថ្ងៃទី១៥ ខែវិច្ឆិកា។
សមត្ថកិច្ចបានឱ្យដឹងថា មុនកើតហេតុ មានម៉ូតូម៉ាកហុងដាឌ្រីម ផ្លាកលេខកំពង់ឆ្នាំង 1I-9593 អ្នកបើកបរឈ្មោះ ប៉ិច តូច ភេទស្រី អាយុ៤៦ឆ្នាំ។ម៉ូតូនោះបានឌុបឈ្មោះ ឈៀង មាន ភេទស្រី អាយុ៤៧ឆ្នាំ នៅភូមិទំនប់ ឃុំសែនដី ស្រុកសំរោងទង ខេត្តកំពង់ស្ពឺ ។
មកដល់កន្លែងខាងលើបានប៉ះជាមួយរថយន្តម៉ាកហ៊ីយ៉ាន់ដាយ ផ្លាកលេខកំពង់ចាម 3A-0445 ម៉ូតូបានដួល ក៏ខ្ទាតមនុស្សចូលក្រោមរថយន្តមួយគ្រឿងទៀតម៉ាកហ៊ីយ៉ានដាយ ផ្លាកលេខភ្នំពេញ 3F-3510 សណ្តោងរ៉ឺម៉កបណ្តាលឱ្យស្លាប់ម្នាក់ របួសធ្ងន់ម្នាក់។ចំណែកអ្នកបើកបររថយន្ដបានរត់គេចខ្លួនបាត់។
ក្រោយកើតហេតុ សមត្ថកិច្ចបានយកមធ្យោបាយទាំង៣គ្រឿងទៅ រក្សាទុកនៅប៉ុស្តិ៍នគរបាលរដ្ឋបាលរលាំងគ្រើលដើម្បីបន្តនីតិវិធី ៕ដោយ៖វិចិត្រ