ភ្នំពេញ៖ជនបរទេសម្នាក់ទំនងស្រវឹងស្រា បានបើករថយន្តយ៉ាងលឿនទៅបុកក្បាលថ្មចែកផ្លូវ ពេញទំហឹង បណ្តាលឱ្យបាក់បែក និងរថយន្តខូចខ្ទេចកំណាត់មុខ។គ្រោះថ្នាក់ចរាចរនេះបានកើតឡើងនៅត្រង់ស្តុប៣១០ ផ្លូវព្រះមុនីវង្ស សង្កាត់បឹងកេងកងទី១ ខណ្ឌបឹងកេងកង កាលពីរំលងអធ្រាត្រឈានចូលថ្ងៃទី១៥ ខែវិច្ឆិកា។
កម្លាំងប្រចាំគោលដៅបានឱ្យដឹងថា មុនកើតហេតុ មានជនបរទេសម្នាក់បើករថយន្តម៉ាកឡិចស៊ីស RX400h ផ្លាកលេខ ភ្នំពេញ 2BO-5380 តាមផ្លូវព្រះមុនីវង្សពីជើងទៅត្បូង។មកដល់កន្លែងខាងលើក៏បានបុកក្បាលថ្មចែកផ្លូវបណ្ដាលឱ្យថ្មបាក់បែកនិងរថយន្តខូចខាតយ៉ាងដំណំ។
ក្រោយកើតហេតុ តៃកុងជាជនបរទេសបានចុះពីលើរថយន្ដក្នុងស្ថានភាពស្រវឹងស្រាខ្លាំង ត្រូវសមត្ថកិច្ចនាំទៅប៉ុស្តិ៍រដ្ឋបាលដើម្បីវាស់ជាតិអាល់កុល។ចំណែករថយន្តយកទៅរក្សាទុកនៅការិយាល័យនគរបាលចរាចរណ៍រាជធានីភ្នំពេញដើម្បីដោះស្រាយពេលក្រោយ៕ដោយ៖វិចិត្រ
