ក្រោយបានជួបគ្នាដោយផ្ទាល់នៅកោះបាលីប្រទេសឥណ្ឌូណេស៊ីមុនកិច្ចប្រជុំ G20 មេដឹកនាំចិន និងអាម៉េរិកបានសម្ដែងគោលជំហរវិជ្ជមានចំពោះគ្នា អះអាងថានឹងមិនឲ្យសង្រ្គាមត្រជាក់កើតឡើងនោះទេ។
![](https://cambodiaflashnews.com/wp-content/uploads/2021/06/top-banner.gif)
យោងតាមសម្រង់សម្ដីពីការិយាល័យរដ្ឋាភិបាលទាំងសងខាង ចិននិងអាម៉េរិកនៅថ្ងៃអង្គារសប្តាហ៍នេះ បានឲ្យដឹងថា ទាំងលោកប្រធានាធិបតីចិនស៊ីជីនពីង និងប្រធានាធិបតីអាម៉េរិកចូបៃដិន បានសម្ដែងក្តីរីករាយរាក់ទាក់ដាក់គ្នាគួរឲ្យកត់សម្គាល់ក្រោយបានធ្វើដំណើរទៅកាន់កិច្ចប្រជុំប្រទេសសេដ្ឋកិច្ចទាំង២០នៅកោះបាលីប្រទេសឥណ្ឌូណេស៊ីតាមការគ្រោងទុក បើទោះបីជាភាគីទាំងពីរកំពុងមានភាពតានតឹងក្តៅក្រហាយរឿងកោះតៃវ៉ាន់ និងពាណិជ្ជកម្មក៏ដោយ។ មេដឹកនាំទាំងពីរបានចូលរួមកិច្ចប្រជុំដាច់ដោយឡែកមួយកាលពីថ្ងៃចន្ទដែលមានរយៈពេលបីម៉ោង ពាក់ព័ន្ធនឹងការពិភាក្សាដោយស្មោះត្រង់លើបញ្ហាជាច្រើន រួមទាំងតៃវ៉ាន់ ពាណិជ្ជកម្ម និងការឈ្លានពានរបស់រុស្ស៊ីលើអ៊ុយក្រែន។ បន្ទាប់ពីកិច្ចពិភាក្សា លោក Biden បានប្រាប់អ្នកយកព័ត៌មានថា លោកជឿជាក់ថា “មិនចាំបាច់មានសង្រ្គាមត្រជាក់ថ្មីទេ” សហរដ្ឋអាម៉េរិកនិងចិន ត្រូវតែធ្វើការរួមគ្នា ដើម្បីដោះស្រាយបញ្ហាប្រឈមឆ្លងដែន ដូចជាការប្រែប្រួលអាកាសធាតុ ស្ថិរភាពម៉ាក្រូសេដ្ឋកិច្ចពិភពលោក រួមទាំងការបន្ធូរបន្ថយបំណុល សន្តិសុខសុខភាព និងសន្តិសុខស្បៀងពិភពលោក ព្រោះនោះជាអ្វីដែលសហគមន៍អន្តរជាតិរំពឹងទុក។
ទីភ្នាក់ងារសារព័ត៌មានចិន Xinhua ក៏បានដកស្រង់សម្តីលោក Xi ផងដែរដោយនិយាយថា “ភាគីទាំងពីរគួរតែធ្វើការជាមួយប្រទេសទាំងអស់ ដើម្បីនាំមកនូវក្តីសង្ឃឹមបន្ថែមទៀតដល់សន្តិភាពពិភពលោក ទំនុកចិត្តកាន់តែខ្លាំងនៅក្នុងស្ថិរភាពពិភពលោក និងកម្លាំងរុញច្រានដ៏រឹងមាំដល់ការអភិវឌ្ឍរួម”។ យ៉ាងណាមិញ បញ្ហាតៃវ៉ាន់នៅតែមិនត្រូវបានបញ្ជាក់ឲ្យបានក្បោះក្បាយជាសាធារណៈចំៗនោះទេ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា