ការរាប់ថយក្រោយរយៈពេល ១សប្តាហ៍ទៅកាន់ព្រឹត្តិការណ៍ World Cup នៅប្រទេសកាតា បានចាប់ផ្តើមកាលពីថ្ងៃចន្ទ ខណៈដែលកីឡាករបាល់ទាត់ល្បីៗរបស់ពិភពលោក បានផ្តោតការយកចិត្តទុកដាក់របស់ពួកគេទៅលើការប្រកួតដ៏ចម្រូងចម្រាសបំផុតមួយ ក្នុងប្រវត្តិសាស្ត្រនៃកីឡានេះ។
បន្ទាប់ពីការប្រកួតកាលពីចុងសប្តាហ៍មុន លីគអាជីពក្នុងស្រុក បានផ្អាករយៈពេល ៦សប្តាហ៍ សម្រាប់កម្មវិធីដ៏ធំបំផុតរបស់ពិភពលោកនេះ ប៉ុន្តែពេលវេលាគឺខ្លីណាស់សម្រាប់ការរៀបចំត្រៀមខ្លួនរបស់ក្រុមនីមួយៗ។
ការប្រកួតបាល់ទាត់ពិភពលោកលើកដំបូង ដែលនឹងធ្វើឡើងនៅក្នុងដែនដីរបស់អារ៉ាប់ នឹងចាប់ផ្តើមនៅថ្ងៃអាទិត្យ នៅពេលដែលប្រទេសម្ចាស់ផ្ទះជួបជាមួយក្រុមអេក្វាឌ័រ។
ការប្រារព្ធព្រឹត្តិការណ៍ World Cup នៅក្នុងរដ្ឋវាលខ្សាច់នេះ តម្រូវឱ្យមានការកែប្រែប្រតិទិនបាល់ទាត់អន្តរជាតិដែលមិនធ្លាប់មាន ដោយផ្លាស់ប្តូរការប្រកួតពីពេលវេលាធម្មតា ក្នុងរដូវក្តៅនៃអឌ្ឍគោលខាងជើង ដើម្បីជៀសវាងអាកាសធាតុក្ដៅខ្លាំងរបស់រដ្ឋឈូងសមុទ្រ។
ជាមួយគ្នានេះ ក្រុមជម្រើសជាតិ ដែលដណ្ដើមបានសិទ្ធិមកដល់ជុំចុងក្រោយនេះ បានធ្វើដំណើរទៅដល់ជាបណ្ដើរៗហើយ ខណៈក្រុមធំៗ ២ របស់អឺរ៉ុប អង់គ្លេស និងហូឡង់ ស្ថិតក្នុងចំណោមក្រុមដែលនឹងត្រូវមកដល់នៅថ្ងៃអង្គារនេះ។
កីឡដ្ឋានថ្មីមានតម្លៃជាង ៦,៥ពាន់លានដុល្លារ ហើយប្រព័ន្ធរថភ្លើងក្រោមដីគ្មានអ្នកបើកបរ ដែលមានតម្លៃ ៣៦ពាន់លានដុល្លារ នឹងបម្រើដល់កីឡដ្ឋានចំនួន ៥ ក្នុងចំណោមកីឡដ្ឋានទាំង ៨។ មានការប៉ាន់ប្រមាណមួយចំនួនថា ការចំណាយលើហេដ្ឋារចនាសម្ព័ន្ធសរុបក្នុងរយៈពេល ១ទសវត្សរ៍កន្លងមកនេះ មានចំនួន ២០០ពាន់លានដុល្លារ។
គណៈកម្មការរៀបចំកម្មវិធី បានព្យាករថា អ្នកគាំទ្រច្រើនជាង ១លាននាក់ នឹងធ្វើដំណើរមកកាន់ប្រទេសកាតា ហើយពួកគេបានឆ្លើយតបទៅនឹងការព្រួយបារម្ភអំពីការខ្វះខាតកន្លែងស្នាក់នៅ ដោយប្រើប្រាស់កប៉ាល់ទេសចរណ៍ចំនួន៣ ជាសណ្ឋាគារបណ្តែតទឹក។
ក្រុមអ្នករៀបចំបានឱ្យដឹងថា សំបុត្រចំនួន ២,៩លាននៃសំបុត្រចំនួន ៣,១លានសន្លឹក ត្រូវបានលក់ ហើយអ្នកគាំទ្របានរង់ចាំនៅខាងក្រៅមជ្ឈមណ្ឌលលក់សំបុត្ររបស់ FIFA (សហព័ន្ធបាល់ទាត់អន្តរជាតិ) ដោយសង្ឃឹមថា សំបុត្រដែលខ្វះខាត នឹងមានគ្រប់គ្រាន់ សម្រាប់ការប្រកួតប្រជែងដ៏ធំ ដែលតែងកើតឡើងរៀងរាល់ ៤ឆ្នាំម្ដងនេះ៕