ភ្នំពេញ៖នាពេលបច្ចុប្បន្ននេះកម្ពុជាមានថាមពលអគ្គិសនីសម្រាប់ប្រើប្រាស់ចំនួន៤,២៤៦មេហ្កាវ៉ាត់ខណៈការប្រើប្រាស់ប្រចាំថ្ងៃអស់តែជាង២,១០០មេហ្កាវ៉ាត់ តែប៉ុណ្ណោះ ដែលធ្វើឲ្យកម្ពុជានៅសល់អគ្គិសនីជាងពាក់កណ្ដាលទៀត។នេះបើតាមការឱ្យដឹងរបស់លោក ស៊ុយ សែម រដ្ឋមន្ដ្រីក្រសួងរ៉ែ និងថាមពល។
![](https://cambodiaflashnews.com/wp-content/uploads/2021/06/top-banner.gif)
ក្នុងកិច្ចសន្ទនា ស្ដីពីការប្រើប្រាស់ថាមពលអគ្គិសនី សម្រាប់វិស័យកសិកម្ម នៅទីស្ដីការក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី១៤ ខែវិច្ឆិកា ឆ្នាំ២០២២ លោករដ្ឋមន្ដ្រី ស៊ុយ សែម ក៏បានលើកឡើងពីការអភិវឌ្ឍន៍វិស័យអគ្គិសនីនៅកម្ពុជា ក្នុងរយៈពេល៥ឆ្នាំកន្លងទៅនេះ ដោយឆ្នាំ២០១៨ កម្ពុជាមានអគ្គិសនីចំនួន ២,៦៥០មេហ្កាវ៉ាត់ ប៉ុន្ដែមកដល់បច្ចុប្បន្ននេះនៅឆ្នាំ២០២២ កម្ពុជាមានអគ្គិសនីចំនួន ៤,២៤៦មេហ្កាវ៉ាត់ បើគិតជាភាគរយមានការកើនឡើង៦០%។
រដ្ឋមន្ដ្រីបានឲ្យដឹងថា ក្នុងរយៈពេល៥ឆ្នាំ ការអភិវឌ្ឍន៍បណ្ដាញបញ្ជូនបានធ្វើឲ្យខ្សែបញ្ជូនអគ្គិសនីតង់ស្យុងខ្ពស់ ដែលនៅក្នុងឆ្នាំ២០១៨ កម្ពុជាមាន ២,១៤១គីឡូម៉ែត្រ កើនមកដល់ឆ្នាំ២០២២មាន ៣,៤៨៥គីឡូម៉ែត្រ។ ដោយឡែកអនុស្ថានីយវិញ នៅក្នុងឆ្នាំ២០១៨ មានចំនួន ៣៣កន្លែង មកដល់ឆ្នាំ២០២២មានចំនួន ៦៣កន្លែង។ ក្នុងឆ្នាំ២០១៨ ខ្សែបណ្ដាញបញ្ជូនអគ្គិសនីរបស់កម្ពុជាគ្រប់ដណ្ដប់បានតែ ២០ខេត្តតែប៉ុណ្ណោះ ប៉ុន្ដែនៅក្នុងឆ្នាំ២០២២នេះ ខ្សែបណ្ដាញបញ្ជូនអគ្គិសនី គឺបានគ្រប់ដណ្ដប់ទូទាំងប្រទេស។
សម្រាប់ខ្សែបណ្ដាញចែកចាយអគ្គិសនីតង់ស្យុងមធ្យម នៅក្នុងឆ្នាំ ២០១៨ មានចំនួន ៣១,០៥៦គីឡូម៉ែត្រ និងឆ្នាំ២០២២មានចំនួន ៤២,៧៥០គីឡូម៉ែត្រ និងខ្សែបណ្ដាញចែកចាយអគ្គិសនីតង់ស្យុងទាប នៅក្នុងឆ្នាំ២០១៨ មានចំនួន ៣២,១១៨គីឡូម៉ែត្រ និងឆ្នាំ២០២២ មានចំនួន ៤៤,៣២០គីឡូម៉ែត្រ។
បើតាមរដ្ឋមន្ដ្រីក្រសួងរ៉ែ និងថាមពល សម្រាប់ខ្សែបណ្ដាញគ្រប់ដណ្ដប់នៅតាមភូមិ សម្រាប់ការផ្គត់ផ្គង់អគ្គិសនីពីបណ្ដាញជាតិ មានការកើនឡើងពី ១២,៣០៥ភូមិស្មើនឹង៨៦% នៃចំនួនភូមិទូទាំងប្រទេស នៅក្នុងឆ្នាំ២០១៨ មកដល់ពេលបច្ចុប្បន្នមាន ១៣,៩២៣ភូមិ ស្មើនឹង៩៨.២៧% នៃចំនួនភូមិទូទាំងប្រទេសដែលនៅសល់តែ ២៤៥ភូមិប៉ុណ្ណោះ ស្មើនឹង១.៧៣ភាគរយ៕ដោយៈសិរីមតី