ខ្សែប្រយុទ្ធឆ្នើម Cristiano Ronaldo បាននិយាយថា រូបគេមានអារម្មណ៍ត្រូវបាន «ក្បត់» ដោយក្លិប Manchester United ខណៈដែលរូបគេបានអះអាងថា អ្នកចាត់ការក្រុម លោក Erik ten Hag និងនាយកប្រតិបត្តិជាន់ខ្ពស់ផ្សេងទៀត កំពុងព្យាយាមបង្ខំរូបគេឱ្យចេញពីក្លិប នៅក្នុងបទសម្ភាសពេញដោយកំហឹងមួយកាលពីថ្ងៃអាទិត្យ។
កីឡាករជយលាភីពានរង្វាន់ Ballon d’Or ៥សម័យកាលរូបនេះ បានក្លាយជាតួអង្គមិនសូវសំខាន់នៅលើទីលានសម្រាប់ក្រុមបិសាចក្រហម Man United ចាប់តាំងពីលោក Ten Hag ចូលមកកាន់តំណែង កាលពីខែឧសភា។ កីឡាករ Ronaldo ត្រូវបានពិន័យបន្ទាប់ពីបដិសេធ ក្នុងការដូរចូលលេងអំឡុងជ័យជម្នះ ២-០ លើក្រុម Tottenham កាលពីខែមុន ប៉ុន្តែបានត្រឡប់មកក្រុមវិញក្នុងប៉ុន្មានសប្តាហ៍ថ្មីៗនេះ ហើយថែមទាំងបានធ្វើជាប្រធានក្រុមបិសាច ក្រហមពេលរងបរាជ័យ ៣-១ នៅឯផ្ទះរបស់ក្រុម Aston Villa កាលពីចុងសប្តាហ៍មុនទៀតផង។
តែយ៉ាងណាក្ដី កីឡាករវ័យ ៣៧ឆ្នាំរូបនេះ មិនមានអវត្តមាននោះទេ នៅពេលដែលក្រុមបិសាចក្រហមបានឈ្នះក្រុមម្ចាស់ផ្ទះ Fulham ២-១ កាលពីថ្ងៃអាទិត្យម្សិលមិញ ក្នុងការប្រកួតចុងក្រោយ មុនពេលឈប់សម្រាក ៦សប្តាហ៍ សម្រាប់ព្រឹត្តិការណ៍ World Cup។
«ខ្ញុំមិនមានការគោរពចំពោះគាត់ ពីព្រោះគាត់ក៏មិនបានបង្ហាញការគោរពចំពោះខ្ញុំដែរ។ មិនត្រឹមតែគ្រូបង្វឹកប៉ុណ្ណោះទេ ប៉ុន្តែមានបុគ្គល ២-៣នាក់ផ្សេងទៀត នៅជុំវិញក្លិប។ ខ្ញុំមានអារម្មណ៍ថា ត្រូវបានគេក្បត់»។ នេះជាសម្ដីរបស់កីឡាករ Ronaldo ដែលបាននិយាយពីលោក Ten Hag ក្នុងបទសម្ភាសជាមួយកម្មវិធីទូរទស្សន៍ Piers Morgan Uncensored។
នៅពេលត្រូវបានសួរម្តងទៀតថា តើនាយកប្រតិបត្តិក្លិបជាន់ខ្ពស់ ព្យាយាមបង្ខំឱ្យរូបគេចាកចេញមែនទេ? កីឡាករ Ronaldo បានឆ្លើយតបថា៖ «មែន! ខ្ញុំមានអារម្មណ៍ថា ត្រូវគេក្បត់ ហើយខ្ញុំមានអារម្មណ៍ថា មនុស្សមួយចំនួនហាក់ដូចជាមិនចង់ឱ្យខ្ញុំនៅទីនេះ មិនត្រឹមតែឆ្នាំនេះទេ ប៉ុន្តែឆ្នាំមុនផងដែរ»។
កីឡាករ Ronaldo បានត្រឡប់មកកាន់ទឹកដី Old Trafford វិញ ក្នុងខែសីហា ឆ្នាំ២០២១ ដោយចាកចេញពីក្លិប Juventus។ ពេលវេលាដំបូងរបស់គេនៅជាមួយក្លិប Man United គឺជារឿងដ៏រុងរឿងមួយក្រោមការដឹកនាំរបស់លោក Alex Ferguson ដោយបានឈ្នះពានរង្វាន់ក្របខ័ណ្ឌ Premier League ៣ដង និង Champions League ម្ដង ហើយព្រមទាំងបានគ្រងពានរង្វាន់ Ballon d’Or ជាលើកទី១ ក្នុងនាមជាកីឡាករល្អបំផុត នៅលើពិភពលោក៕
