កីឡាករ James Maddison បានប្រាប់ឱ្យដឹងពីការវិវឌ្ឍថ្មីចុងក្រោយ ពាក់ព័ន្ធនឹងបញ្ហារបួសរបស់ខ្លួន ដែលបានកើតឡើង អំឡុងការប្រកួតរបស់ក្រុម Leicester ទល់នឹងក្រុមម្ចស់ផ្ទះ West Ham កាលពីថ្ងៃសៅរ៍។
កីឡាករ Maddison បានចូលលេង ក្នុងហ្គេមនេះ ជាមួយនឹងអារម្មណ៍ល្អ និងរំភើប បន្ទាប់ពីមានការបញ្ចូលឈ្មោះដ៏គួរឱ្យភ្ញាក់ផ្អើលទៅក្នុងក្រុមជម្រើសជាតិអង់គ្លេសរបស់លោក Gareth Southgate សម្រាប់ព្រឹត្តិការណ៍ World Cup 2022 នៅប្រទេសកាតា ហើយបន្ទាប់មកអ្វីៗ ក៏រឹតតែប្រសើរឡើង ដោយរូបគេបានជួយឱ្យក្រុម Leicester នាំមុខក្រុម West Ham នៅនាទីទី៨។
យ៉ាងណាក្ដី ត្រឹមតែជាង ១៥នាទីក្រោយមក រូបគេត្រូវបានដូរចេញដោយបង្ខំ បន្ទាប់ពីបានអង្គុយចុះ ហើយឱបក្បាលជង្គង់ ដោយបង្ហាញពីអាការឈឺចាប់ ដែលនេះ ធ្វើឱ្យឱកាស ក្នុងការបានទៅចូលរួម នៅ World Cup របស់គេ ស្ថិតក្នុងការភាពស្រពេចស្រពិល។ ប៉ុន្តែពេលនេះរូបគេបានបញ្ជាក់ហើយថា វាហាក់ដូចជាមិនមានរបួសធ្ងន់ធ្ងរនោះទេ។
«ខ្ញុំគួរតែមិនអីទេ ខ្ញុំគិតបែបហ្នឹង»។ នេះជាការសម្ដីខ្លីៗរបស់កីឡាករ Maddison ដែលបាននិយាយទាក់ទងនឹងឱកាសរបស់ខ្លួន ក្នុងការមានភាពរឹងមាំល្អ ដើម្បីអាចធ្វើដំណើរទៅកាន់ប្រទេសកាតាបាន។
សម្រាប់ការប្រកួតវិញ ក្រុម Leciester រកបាន ១គ្រាប់ទៀត នៅវគ្គទី២ ដើម្បីទទួលបានជ័យជម្នះ ២-០ ដែលជាលទ្ធផលជួយឱ្យពួកគេឡើងទៅលេខ ១២ ក្នុងតារាងពិន្ទុនៃក្របខ័ណ្ឌ Premier League៕
