នាយកប្រតិបត្តិ (CEO) របស់ក្លិប Borussia Dortmund លោក Hans-Joachim Watzke បានបញ្ជាក់ថា ក្លិបគ្រោងនឹងអង្គុយចុះ ដើម្បីពិភាក្សាពីអនាគតរបស់កីឡាករ Jude Bellingham ជាមួយនឹងសាមីខ្លួនផ្ទាល់ បន្ទាប់ពីការប្រកួតបាល់ទាត់ពិភពលោក (World Cup)។
![](https://cambodiaflashnews.com/wp-content/uploads/2021/06/top-banner.gif)
ខ្សែបម្រើ Bellingham វ័យ ១៩ឆ្នាំ បានក្លាយជាកីឡាករមានទេពកោសល្យដ៏គួរឱ្យភ្ញាក់ផ្អើលបំផុតម្នាក់ ក្នុងពិភពលោក ចាប់តាំងពីបានមកចូលរួមជាមួយក្លិបអាល្លឺម៉ង់ ដោយការចាកចេញពីក្លិប Birmingham ក្នុងឆ្នាំ២០២០ ហើយបានទាក់ទាញការអារម្មណ៍ពីស្ទើរតែគ្រប់ក្លិបកំពូលៗ នៅអឺរ៉ុប ដូចជា Real Madrid, Manchester City, Liverpool, Chelsea, Manchester United, Bayern Munich, Juventus និង Paris Saint Germain ដែលសុទ្ធតែបានបង្ហាញឱ្យឃើញ ក្នុងរយៈពេលប៉ុន្មានខែថ្មីៗនេះ។
ជាមួយគ្នានេះ ក្លិប Dortmund មានទំនុកចិត្តថា កីឡាករ Bellingham នឹងមិនជំរុញឱ្យមានការចាកចេញនោះទេ ហើយថែមទាំងទំនងជាជ្រើសរើសស្នាក់នៅជាមួយក្លិបបន្តយ៉ាងហោចណាស់ ១រដូវកាលទៀត។ តែយ៉ាងណាក្ដី លោក Watzke បានទទួលស្គាល់ថា ក្លិបរបស់លោក ប្រហែលជាគ្មានកម្លាំងគ្រាប់គ្រាន់ ក្នុងការប្រកួតប្រជែងជាមួយនឹងថាមពលផ្នែកហិរញ្ញវត្ថុរបស់អ្នក ដែលស្នើមកមួយចំនួននោះឡើយ។
លោក Wazke បានប្រាប់កាសែត BILD ថា៖ «ខ្ញុំគិតថា ឆាប់ៗ ពេលព្រឹត្តិការណ៍ នៅកាតា បានបញ្ចប់ យើងនឹងមានការសន្ទនាមូលដ្ឋានអំពីអ្វី ដែលរូបគេ (Bellingham) ចង់បានពិតប្រាកដ។ ជាមួយគេ ជាមួយឪពុកម្តាយរបស់គេ ជាមួយអ្នក ដែលពួកយើងមានទំនាក់ទំនងយ៉ាងជិតស្និទ្ធ ហើយពិតណាស់ជាមួយទីប្រឹក្សារបស់គេ»។
«ហើយបន្ទាប់មក រូបគេគួរតែប្រាប់យើងថា តើរូបគេចង់ស្នាក់នៅបន្ត ឬក៏ចាកចេញ។ តែមិនថា ដោយវិធីណា យើងនឹងពិភាក្សាគ្នាយ៉ាងរីករាយ និងមានហេតុផល។ យើងមិនចាំបាច់ធ្វើពុតថា ប្រធានបទមិនត្រូវបានពិភាក្សានោះឡើយ។ តែទោះជាយ៉ាងណាក្ដី នៅពេលដែលមានក្រុមធំៗស្នើមក យើងក៏មិនអាចមានលទ្ធភាព ក្នុងការតស៊ូជាមួយនឹងផ្នែកហិរញ្ញវត្ថុបានដូចគ្នាដែរ»។ លោក CEO បានបន្ថែម៕