កំពង់ចាម៖ ធនាគារអភិវឌ្ឍន៍អាស៊ី ហៅកាត់ថា អេឌីប៊ី (ADB) នឹងចាប់ផ្តើមអនុវត្តស្ថាបនាគម្រោងប្រព័ន្ធរំដោះទឹកកខ្វក់ និងទឹកភ្លៀងច្រករបៀងបួននៅក្នុងក្រុងកំពង់ចាម ដែលនៅជាប់គាំងរយៈពេលច្រើនឆ្នាំមកនោះ នៅដើមឆ្នាំក្រោយ ២០២៣ ឆាប់ៗខាងមុខនេះ។ នេះបើតាមការឱ្យដឹងពីខាងមន្រ្តីបច្ចេកទេសអនុវត្តគម្រោងរបស់ធនាគារមួយនេះ ដែលបានជម្រាបប្រាប់លោក អ៊ុន ចាន់ដា អភិបាលខេត្តកំពង់ចាម ក្នុងឱកាសដែលលោក និងសហការី ដឹកនាំមន្រ្តីរាជការចុះពិនិត្យផ្លូវក្រាលកៅស៊ូចូលទៅកាន់សួនគ្រញូង ក្នុងសង្កាត់សំបួរមាស ក្រុងកំពង់ចាម នៅព្រឹកថ្ងៃទី ១៤ វិច្ឆិកានេះ។
លោក លឹម សុខហៀង ប្រធានមន្ទីរសាធារណការ និងដឹកជញ្ជូនខេត្តកំពង់ចាមដែលបានអមដំណើរប្រតិភូចុះពិនិត្យផ្លូវ មានការចូលរួមពីខាងភាគីម្ចាស់គម្រោង ADB ដឹកនាំដោយលោក អ៊ុន ចាន់ដា បានឱ្យដឹងថា៖ ក្នុងនោះលោកអភិបាលខេត្តកំពង់ចាមបានស្នើដល់ ខាងម្ចាស់គម្រោងរំដោះទឹកកខ្វក់ និងទឹកភ្លៀងនៅក្នុងក្រុងកំពង់ចាម ជួយពង្រីកទំហំទទឹងប្រឡាយរំដោះទឹកភ្លៀងឱ្យបានធំជាងក្នុងផែនការមួយម៉ែត្រ គឺនឹងចាប់ផ្តើមអនុវត្តនៅក្នុងរង្វង់ខែមករា ឆ្នាំ២០២៣ ខាងមុខ។
លោកប្រធានមន្ទីរសាធារណការ និងដឹកជញ្ជួនបានបន្តថា៖ បើសាងសង់តាមគម្រោងផែនការទទឹងប្រឡាយមួយម៉ែត្រនោះ គឺមិនអាចធានាបានបរិមាណទឹកភ្លៀង ដោយនៅតែជន់លិចនៅតំបន់ទំនាប ប៉ះដល់ប្រព័ន្ធផ្លូវគមនាគមន៍ ការធ្វើដំណើររបស់ប្រជាពលរដ្ឋ និងជន់លិចលំនៅឋានរយៈពេលច្រើនម៉ោងដដែល នេះជាបទពិសោធន៍ច្រើនឆ្នាំ នារដូវវស្សា។
លោក ហាន លីណា អភិបាលរងក្រុងកំពង់ចាមបានឱ្យដឹងដែរថា៖ នេះជាគម្រោងច្រករបៀងបួន អភិវឌ្ឍន៍ទីក្រុងមានចំនួនពីរ ប្រទេសក្នុងតំបន់ទន្លេមេគង្គ គឺប្រទេសឡាវ( ក្រុងបាសេ) និងប្រទេសកម្ពុជា ( ក្រុងក្រចេះ ក្រុងស្ទឹងត្រែង និងក្រុងកំពង់ចាម ) របស់ធនាគារអភិវឌ្ឍន៍អាស៊ី (ADB) សិក្សារយៈពេល ប្រាំឆ្នាំ។
លោកអភិបាលរងក្រុងកំពង់ចាមបានបន្តថា៖ ឥឡូវការសិក្សាហាក់បានចប់ហើយ ដែលនឹងអាចចាប់ផ្តើមដំណើរការស្ថាបនានៅដើមឆ្នាំក្រោយ។ ក្នុងនោះមានប្រព័ន្ធលូរំដោះទឹកភ្លៀងជាប្រភេទលូជ្រុងក្នុងសង្កាត់វាលវង់ ដែលលោក អ៊ុន ចាន់ដា អភិបាលខេត្តស្នើឱ្យម្ចាស់គម្រោងពង្រីកទំហំទទឹងឱ្យបានពីរម៉ែត្រ, ប្រព័ន្ធលូមូលរំដោះទឹកកខ្វក់ សង្កាត់វាលវង់ និងសង្កាត់កំពង់ចាមទាំងមូល សង្កាត់សំបួរមាសចំនួន ៣៥ ភាគរយ និងសង្កាត់បឹងកុកចំនួន ៣០ ភាគរយ, អាងប្រតិកម្មមួយកន្លែង ខាងក្រោយសាលាពេទ្យ ភូមិតាណេង និងស្ថានីយបូមទឹកមួយកន្លែង នៅក្បែរទំនប់ព្រែកដើមចាន់ សង្កាត់សំបួរមាស៕
ដោយ៖គង់ហេង