អាល្លឺម៉ង់សំដែងការសោកស្តាយ ជុំវិញអវត្តមានលោកពូទីនមេដឹកនាំរុស្ស៊ីក្នុងកិច្ចប្រជុំប្រទេសសេដ្ឋកិច្ច G20 នៅកោះបាលី ប្រទេសឥណ្ឌូណេស៊ី។
![](https://cambodiaflashnews.com/wp-content/uploads/2021/06/top-banner.gif)
ក្នុងពេលដែលប្រទេសជាសមាជិកជាច្រើនបាននាំគ្នាធ្វើដំណើរជាហូរហែទៅកាន់ប្រទេសឥណ្ឌូណេស៊ីនៅដើមសប្តាហ៍នេះដើម្បីចូលរួមកិច្ចប្រជុំ G20 រួមមានទាំងប្រធានាធិបតីអាម៉េរិកលោកចូបៃដិនផងនោះ ភាគីអាល្លឺម៉ង់អធិការបតី Olaf Scholz ស្រាប់តែបាននិយាយថា លោកមានការសោកស្តាយណាស់ ដែលលោកពូទីនមិនបានមក។ លោកបាននិយាយនៅទីក្រុងហាណូយថា “បើពូទីនមកលើកនេះនឹងល្អជាមិនខាន គាត់នឹងត្រូវមកប្រឈមមុខលាតត្រដាងខ្លួនឯងចំពោះរាល់សំណួរ និងការរិះគន់ទាំងអស់ដែលត្រូវបានលើកឡើងដោយប្រទេសជាច្រើនក្នុងពិភពលោក។ នោះហើយជាមូលហេតុដែលប្រហែលជាគាត់មិនមក”។
គូសបញ្ជាក់ឡើងវិញថា កិច្ចប្រជុំ G20 លើកទី ១៧ នៅកោះបាលីនឹងធ្វើឡើងចាប់ពីថ្ងៃទី ១៥ និង ១៦ ខែវិច្ឆិកា ឆ្នាំ២០២២។ ស្ថានទូតរុស្ស៊ីនៅឥណ្ឌូណេស៊ីបានប្រកាសពីដំណឹងអវត្តមានលោកពូទីនតាំងពីសប្តាហ៍មុនមកម្ល៉េះ តែមិនបានលម្អិតពីហេតុផលវែងឆ្ងាយទេ ខណៈបានចាត់អ្នកតំណាងកំពូលរដ្ឋមន្ត្រីការបរទេស លោក Sergey Lavrov ទៅជំនួសវិញ។ យ៉ាងណាមិញ ក្នុងអំឡុងកិច្ចប្រជុំ G20 នៅថ្ងៃទី ១ ប្រធានាធិបតីអ៊ុយក្រែន លោក Volodymyr Zelenskyy ត្រូវបានគេរំពឹងថានឹងចេញមុខថ្លែងសុន្ទរកថាតាមវីដេអូផងដែរ ដែលជាព្រឹត្តិការណ៍ដ៏រសើបមួយនៃកិច្ចប្រជុំ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា