ភ្នំពេញ៖សហគ្រិនវ័យក្មេងអាស៊ានបានជួបពិភាក្សាគ្នានាព្រឹកថ្ងៃទី១៣ ខែវិច្ឆិកា ឆ្នាំ២០២២ ដោយផ្ដោតសំខាន់លើប្រធានបទ «ការធ្វើពាណិជ្ជកម្មលើសពីតំបន់អាស៊ាន» (TRADE FACILITATION AND COORDINATION BEYOND ASEAN) ។
កិច្ចពិភាក្សាដែលសង្កត់ធ្ងន់លើការដោះដូរពាណិជ្ជកម្មនេះ ធ្វើឡើងក្រោមការចូលរួមពីវាគ្មិនមួយចំនួនរួមមាន៖លោក Kanneth Tang ប្រធានសភាពាណិជ្ជកម្មអូស្ត្រាលីនៅកម្ពុជា,លោក Sandeep Majumdar ប្រធានសភាពាណិជ្ជកម្មឥណ្ឌានៅកម្ពុជា,លោក KITAMI SO នាយកនៃនាយកដ្ឋានស្រាវជ្រាវតំបន់អាស៊ីនិងនាយកដ្ឋានវិភាគសេដ្ឋកិច្ចព័ត៌មាន FTA, JETRO Bangkok។
វេទិកាជជែកដេញដោលនេះ មានសារៈសំខាន់ណាស់សម្រាប់វិស័យសេដ្ឋកិច្ច កម្ពុជាជាមួយនឹងពិភពលោក។ជាជំហានមួយដែលដើរហួសពីការធ្វើពាណិជ្ជកម្មត្រឹមតែក្នុងតំបន់ អាស៊ាន តែជាការពង្រីកវិសាលភាពនៃទំនាក់ទំនងសេដ្ឋកិច្ចជាមួយពិភពលោក។ ក្នុងនោះ ដើម្បីពង្រីកសក្កានុពលនៃការធ្វើពិណិជ្ជកម្មឱ្យលើសពីតំបន់អាស៊ាន វាគ្មិនទាំងបីរូបបាន រំលេចផងដែរនូវភាពសំខាន់នៃវិស័យឯកជនក្នុងការជំរុញការបង្កើតផលិតផលថ្មីៗ ប្រកបដោយគុណ ភាពដើម្បីធានានូវភាពជឿជាក់របស់ដៃគូរអាជីវកម្ម។
វាគ្មិនទាំងបីរូបបានលើកទឹកចិត្តទៅកាន់វិស័យឯកជន ក្នុងការខិតខំប្រឹងប្រែងបន្ថែមទៀត ដោយហេតុថាកម្ពុជានៅមានឱកាសច្រើនក្នុងការពង្រីកចរន្ដនាំចេញទៅទូទាំងពិភពលោកតែម្ដង៕ដោយៈសិរីមតី
