មនុស្ស៦នាក់បានបាត់បង់ជីវិត ៨១នាក់រងរបួស បន្ទាប់ពីភេរវករជាស្រីម្នាក់បានបើកប្រតិបត្តិការបំផ្ទុះគ្រាប់បែកនៅកណ្តាលទីក្រុងអ៊ីស្តង់ប៊ុលប្រទេសតួកគី។
គិតត្រឹមព្រឹកថ្ងៃចន្ទ ទី១៤ ខែវិច្ឆិកានេះ អាជ្ញាធរតួកគីបាននិយាយថា មនុស្សយ៉ាងហោចណាស់ ៦ នាក់បានស្លាប់ និង ៨១នាក់បានរងរបួសក្នុងការផ្ទុះមួយនៅក្នុងតំបន់ដ៏មមាញឹកនៃកណ្តាលទីក្រុងអ៊ីស្តង់ប៊ុល។ ក្នុងចំណោមអ្នករងគ្រោះក៏មានបុគ្គលិកក្រសួងរដ្ឋាភិបាលម្នាក់ និងកូនស្រីតូចម្នាក់ផងដែរ។ ការផ្ទុះនេះបានកើតឡើងនៅម៉ោងប្រហែល ៤ និង ២០ល្ងាចម៉ោងក្នុងស្រុក កាលពីថ្ងៃអាទិត្យ នៅលើផ្លូវទីប្រជុំជនលក់អីវ៉ាន់ក្នុងតំបន់ Taksim Square កណ្តាលទីក្រុងអ៊ីស្តង់បុល ប្រទេសតួកគី។ រដ្ឋមន្ត្រីក្រសួងយុត្តិធម៌ Bekir Bozdag បានប្រាប់ប្រព័ន្ធផ្សព្វផ្សាយតួកគីថា ជនបង្កជាស្រី្ត នាងបានអង្គុយនៅលើកៅអីក្នុងកន្លែងកើតហេតុអស់រយៈពេលជាង ៤០នាទី មុនពេលការផ្ទុះបានកើតឡើង។
រដ្ឋមន្ត្រីក្រសួងមហាផ្ទៃតួកគី លោក Suleyman Soylu បាននិយាយថា ជនបង្កគឺជា បណ្តាញនៃគណបក្សពលករ (PKK) ខណៈ ក្រុមនេះជាសកម្មប្រយុទ្ធដែលទាមទារឱ្យមានរដ្ឋឯករាជ្យឃើឌីសស្តង់នៅក្នុងប្រទេសតួកគី។សហភាពអឺរ៉ុប និងសហរដ្ឋអាម៉េរិកចាត់ទុកបក្សនេះថាជាអង្គការភេរវករ៕
ប្រភព៖ BBC NEWS
ប្រភពរូប៖BBC NEWS
ប្រែសម្រួល៖សុខ តុលា
