បាត់ដំបង៖ ចាប់ផ្តើមធ្លាក់ខ្យល់រំហើយឆ្នាំនេះត្រីស្ទឹងសង្កែឡើងច្រើនប្លែកពីធម្មតាប្រជាពលរដ្ឋនាំគ្នាសម្រុកចុះនេសាទដើម្បីលក់ដូរ និងធ្វើប្រហុក ផ្អក ត្រៀមបម្រុងទុក។
រដូវធ្លាក់ខ្យល់ត្រជាក់ចាប់ផ្តើមបានធ្វើឲ្យហ្វូងត្រីច្រើនប្រភេទផ្លាស់ប្តូរទីកន្លែងឡើងច្រើនក្នុងស្ទឹងសង្កែ ត្រង់ចំណុចផ្នែកខាងក្រោមជាប់ទំនប់សាលាតាអន ក្នុងភូមិព្រែកញ្ច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង។ ពលរដ្ឋអ្នកនេសាទជនជាតិខ្មែរដែលប្រើឧបករណ៍សំណាញ់ម្នាក់បានប្រាប់ថា÷ ដើមខែកក្តិក ឆ្នាំនេះត្រីក្នុងស្ទឹងសង្កែបានឡើងសម្បូរខ្លាំងនៅចន្លោះថ្ងៃ ៩កើត ដល់ថ្ងៃ ១រោចថ្មីៗកន្លងមក នេះ។ ត្រីចម្រុះតូច ធំ ចាប់តាំងពីថ្ងៃឡើងខ្លាំងភ្លាមមានបងប្អូនប្រជាពលរដ្ឋជាច្រើនមកពីគ្រប់ទិសទី ពិសេសបងប្អូនខ្មែរឥស្លាមបាននាំ គ្នាសម្រុកមកនេសាទយ៉ាងពពាក់ពពូនទាំងយប់ ទាំងថ្ងៃ រហូតរាប់រយនាក់ ដែលប្រជានេសាទខ្លះប្រើឧបករណ៍សំណាញ់ មង ឬខ្នងដួសផ្សេងៗគ្នា។ ចំណែកឯពលរដ្ឋមួយចំនួនទៀតបានធ្វើដំណើរមកលេងកម្សាន្ត និងទិញត្រីធ្វើម្ហូប ផ្អក ប្រហុក ធ្វើត្រីឆ្អើរជាដើម។
រីឯអ្នកស្រី ម៉ាត់ ណាស់ ជាខ្មែរឥស្លាមបានរៀបរាប់ឲ្យដឹងនៅថ្ងៃទី ១៣ ខែវិច្ឆកា ឆ្នាំ ២០២២ថា÷ ត្រីបានឡើងខ្លាំងទាំងហ្វូងៗជាប់ៗគ្នាជាច្រើនថ្ងៃតាំងពីដើមខែវិច្ឆកា មក។ ប្តីរបស់អ្នកស្រីរកត្រីបានក្នុងមួយថ្ងៃពី ៥០ ទៅ ៨០គីឡូក្រាម មានប្រភេទរៀល ត្រីកញ្ចុះ ត្រីឆ្ពិន តាអោន និងកំពឹសផងដែរ។ ចំពោះតម្លៃ ត្រី ស ឬត្រីរៀលមានតូច មានធំក្នុងមួយគីឡូក្រាមលក់បានតម្លៃចាប់ពី ១៣០០រៀល ដល់៤៥០០រៀល, ត្រីកញ្ចុះលក់បានតម្លៃ ៥០០០រៀល, ត្រីតាអោន និងកំពឹសលក់បានក្នុងតម្លៃចន្លោះពី ១៥០០០រៀល ដល់ ២៥០០០រៀល។
អ្នកស្រីបន្តថា÷ អំឡុងត្រីស្ទឹងសង្កែឡើងច្រើនប៉ុន្មានថ្ងៃមកនេះលោកស្រីរកប្រាក់ចំណូលបានច្រើនគួរសមដែរ នៅថ្ងៃខ្លះរកប្រាក់បានចំនួន ២០ ដល់ ៣០ម៉ឺនរៀល ប៉ុន្តែចុងក្រោយនេះផលត្រីចុះបន្តិច រកប្រាក់ចំណូលបានតែពី ៧ម៉ឺន ដល់ ១៥ម៉ឺនតែប៉ុណ្ណោះ។ បច្ចុប្បន្ននៅតែបន្តមានប្រជានេសាទរាប់រយនាក់នាំគ្នាសម្រុកនេសាទ មានទាំងលក្ខណះអាជីព និងតាមបែបគ្រួសារលេងកម្សាន្តសប្បាយថែមទៀត៕ដោយ៖ព្រះអង្គខ្មៅ
