ប៉ៃលិន៖បុរស២នាក់ធ្វើដំណើរទៅគាស់គល់ឈើ ដល់ម៉ោងដាំបាយក៏បានយកសាំងចាក់បង្កាត់ភ្លើង ត្រូវភ្លើងឆាបឆេះពេញខ្លួន បណ្តាលឱ្យរងរបួសធ្ងន់ទាំង២នាក់។
មន្ត្រីនគរបាលប៉ុស្តិ៍បានឱ្យដឹងថា កាលពីព្រលប់ថ្ងៃទី១៣ ខែវិច្ឆិកា មានបុរស២នាក់បានយកសាំងចាក់ចេញពីប៊ីដុងដើម្បីបង្កាត់ភ្លើងដាំបាយ ត្រូវភ្លើងឆាបឆេះសន្ធោសន្ធៅពេញខ្លួនបណ្តាលឱ្យរងរបួសធ្ងន់ទាំង២នាក់។ករណីនោះបានកើតនៅម្តុំគគីរប្រហោងអូរស្លេវ ស្ថិតក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ។
មន្ត្រីដដែលបានបន្តថា ជនរងគ្រោះដែលត្រូវភ្លើងឆេះឈ្មោះ ឡោះ យូរ អាយុ៣៨ឆ្នាំ នៅភូមិក្រចាប់ សង្កាត់អូរតាវ៉ៅ ខេត្តប៉ៃលិន និងឈ្មោះ ឌឿង ដាំ អាយុ១៩ឆ្នាំ នៅភូមិ សង្កាត់ជាមួយគ្នា។ពួកគេមានមុខរបរដើរជីកគល់ឈើយកទៅលក់។
បន្ទាប់ពីមានហេតុការណ៍ដ៏ព្រឺព្រួចនោះមក កម្លាំងអាជ្ញាធរសង្កាត់អូរតាវ៉ៅបានជួយដឹកជនរងគ្រោះទាំង២នាក់តាមរថយន្តយកទៅមន្ទីរពេទ្យសង្គ្រោះភ្លាមៗ៕ដោយ៖វិចិត្រ