ក្រោយបានប្រកាសដកទ័ពចេញពីតំបន់ឃើសនអ៊ុយក្រែនភាគខាងត្បូង រុស្ស៊ីបានអះអាងចុងក្រោយថា ពួកគេបានបង្វែរយុទ្ធសាស្រ្តដណ្តើមបានភូមិថ្មីនៅខេត្តដូណេតភាគខាងកើត។
![](https://cambodiaflashnews.com/wp-content/uploads/2021/06/top-banner.gif)
យោងតាមការចុះផ្សាយដោយសារព័ត៌មានអាល់ចាហ្សេរ៉ា កាលពីថ្ងៃអាទិត្យទី១៣ ខែវិច្ឆិកា ឆ្នាំ២០២២ កងកម្លាំងបំបែកខ្លួនដែលគាំទ្រដោយរុស្ស៊ីនៅក្នុងតំបន់ខេត្ត Donetsk នៃប្រទេសអ៊ុយក្រែន បានរាយការណ៍មកថា ពួកគេពិតជាបានដណ្តើមបានភូមិចំនួនពីរនៅជិតទីក្រុងឧស្សាហកម្ម Bakhmut ខ្សែបន្ទាត់ភាគខាងកើតនៃខេត្តដូណេតអ៊ុយក្រែនមែន។ ភូមិទាំងនោះស្ថិតនៅភាគខាងត្បូងនៃទីក្រុង Bakhmut ដែលជាទីក្រុង ផលិតស្រា និងអំបិល ដែលធ្លាប់មានប្រជាជនប្រមាណ ៧០០០០នាក់រស់នៅ។ ភូមិមួយក្នុងចំណោមនោះមានឈ្មោះថា Majorsk ស្ថិតនៅក្បែរទីប្រជុំជន Horlivka។
ចំពោះព័ត៌មាននេះ អ៊ុយក្រែនមិនទាន់បានបញ្ចេញរបាយការណ៍លម្អិតអំពីភូមិខាងលើនៅឡើយទេ ប៉ុន្តែនៅក្នុងសុន្ទរកថាវីដេអូមួយកាលពីថ្ងៃសៅរ៍ ប្រធានាធិបតីអ៊ុយក្រែន Zelenskyy បានទទួលស្គាល់ពីការវាយប្រហារយ៉ាងខ្លាំងរបស់រុស្ស៊ីនៅក្នុងខេត្តដូណេត។ លោកបានមានប្រសាសន៍ថា “វាជានរកសុទ្ធសាធនៅទីនោះ”។ កងកម្លាំងអ៊ុយ ក្រែនកំពុងទប់ទល់នឹងការវាយប្រហាររបស់រុស្ស៊ីយ៉ាងសន្ធាប់នៅដូណេត។ ជាមួយគ្នានេះ អភិបាលអ៊ុយក្រែននៅដូណេត លោក Pavlo Kyrylenko ក៏បានរាយការណ៍ពីអ្នកស្លាប់ពីរនាក់ និងរបួសម្នាក់ផងដែរ។ អ្នកស្លាប់ក្នុងការវាយប្រហារនេះគឺសុទ្ធតែជាជនស៊ីវិល៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា