ក្រុមកាំភ្លើងធំ Arsenal បានឆ្ពោះទៅកាន់ការឈប់សម្រាក សម្រាប់ព្រឹត្តិការណ៍ World Cup ដោយការមានគម្លាតដាច់ ៥ពិន្ទុ នៅទីកំពូលតារាងនៃក្របខ័ណ្ឌ Premier League បន្ទាប់ពីពួកគេបានយកឈ្នះក្រុម Wolverhampton Wanderers (Wolves) ២-០ កាលពីថ្ងៃសៅរ៍ ខណៈដែលក្រុមមេឃខៀវ Manchester City បានរងបរាជ័យយ៉ាងគួរឱ្យភ្ញាក់ផ្អើល ២-១ ក្នុងផ្ទះខ្លួនឯង ក្រោមដៃរបស់ក្រុម Brentford។
ជាមួយគ្នានេះ ក្រុម Newcastle នៅតែស្ថិតក្នុងចំណាត់ថ្នាក់លេខ ៣ បន្ទាប់ពីបានផ្ដល់ឱ្យក្រុមតោខៀវ Chelsea នូវបរាជ័យ ៣ដងជាប់ៗគ្នា សម្រាប់ការប្រកួតក្នុងលីគ ដោយការយកឈ្នះ ១-០ នៅកីឡដ្ឋាន St. James’ Park ខណៈដែលក្រុម Tottenham ធ្វើបានសម្រេច ២គ្រាប់ ក្នុងរយៈពេល ១០នាទីចុងក្រោយ ដើម្បីវាយបកយកឈ្នះក្រុម Leeds ៤-៣។
ក្រុម Man City មិនចាញ់នោះឡើយ នៅទឹកដី Etihad នេះ តាំងពីខែកុម្ភៈមក ប៉ុន្តែត្រូវបានធ្វើឱ្យស្រឡាំងកាំង ដោយសារការឆ្លើយតបរបស់ខ្សែប្រយុទ្ធ Ivan Toney បន្ទាប់ពីត្រូវបានដកឈ្មោះចេញពីក្រុមជម្រើសជាតិអង់គ្លេស សម្រាប់ព្រឹត្តិការណ៍ World Cup 2022 ជាមួយនឹងការស៊ុតគ្រាប់បាល់ជ័យជម្នះ នៅនាទីទី៩០+៨។
លោក Pep Guardiola បានព្រមានមុនការប្រកួតថា ក្រុមរបស់លោក អាចនឹងលេងដោយមានភ្នែកម្ខាងសម្លឹង (បែកអារម្មណ៍) ទៅ World Cup ព្រោះក្នុងចំណោមកីឡាករជម្រើសដំបូង ១១នាក់ មាន ១០រូប ត្រូវធ្វើដំណើរទៅកាន់ប្រទេសកាតា។
លោក Guardiola បាននិយាយទទួលស្គាល់ថា៖ «ក្រុមដែលល្អជាង បានទទួលជ័យជម្នះ។ យើងមានបញ្ហាច្រើន ហើយយើងមិនអាចធ្វើការគៀបសង្កត់បាន ព្រោះពួកគេក៏មិនបានបណ្ដោយឱ្យយើងធ្វើបែបហ្នឹងឡើយ»។
រីឯក្រុម Arsenal បានឆ្លៀតទាញយកផលទាំងស្រុងពីការរងបរាជ័យរបស់ក្រុមមេឃខៀវនោះ ដើម្បីឱ្យខ្លួនឯងកា្លយជាគូប្រជែងពានរង្វាន់ ដែលមិនអាចមើលស្រាលបាន នៅពេលដែលការប្រកួតរបស់ Premier League ត្រឡប់មកមានសកម្មវិញ ក្រោយផ្អាករយៈពេល ៦សប្តាហ៍ នៅថ្ងៃ Boxing Day (ការប្រកួតក្រោយថ្ងៃបុណ្យគ្រិស្តស្មាស់ ថ្ងៃទី២៦ ខែធ្នូ)។
Martin Odegaard បានក្លាយជាកីឡាករគំរូសម្រាប់ក្រុមកាំភ្លើងធំ ខណៈដែលខ្សែបម្រើសញ្ជាតិន័រវែសរូបនេះ បានស៊ុតបញ្ចូលទីទាំង ២គ្រាប់ សម្រាប់ការដណ្ដើមបាន ៣ពិន្ទុនេះ។
គ្រូបង្វឹកថ្មីរបស់ក្រុម Wolves លោក Julen Lopetegui បានអង្គុយមើលក្នុងចំណោមអ្នកគាំទ្រ មុនពេលចូលកាន់តំណែងជាផ្លូវការ នៅថ្ងៃចន្ទ ហើយមានការងារត្រូវធ្វើ នាពាក់កណ្តាលរដូវកាលនេះ ដោយការទាញក្រុមឱ្យគេចពីតំបន់គ្រោះថ្នាក់ ដែលពេលនេះកំពុងឈរនៅបាតតារាង៕
