ភ្នំពេញ៖ រថយន្តឡិចស៊ីស RX400h បានបើកបុកជាមួយម៉ូតូសណ្ដោងរ៉ឺម៉កពេញទំហឹង បណ្ដាលឲ្យរ៉ឺម៉កក៏ក្រឡាប់ផ្ងារកង់ មនុស្ស៣នាក់រងរបួសធ្ងន់។
គ្រោះថ្នាក់ចរាចរនេះបានកើតឡើងនៅតាមផ្លូវលេខ១៩៩ ក្នុងសង្កាត់ទំនប់ទឹក ខណ្ឌបឹងកេងកង កាលពីរំលងអធ្រាត្រឈានចូលថ្ងៃទី១២ ខែវិច្ឆិកា ឆ្នាំ២០២២។អ្នកនៅជិតទីនោះបានឱ្យដឹងថា មុនកើតហេតុមានរថយន្តម៉ាកឡិចស៊ីស RX400h ផ្លាកលេខ ភ្នំពេញ 2AL-9325 បើកតាមផ្លូវលេខ៤៣០ ពីត្បូងទៅជើង។
មកដល់កន្លែងខាងលើ ស្រាប់តែមានម៉ូតូសណ្ដោងរ៉ឺម៉កបើកចេញពីផ្លូវលេខ១៩៩ ពីលិចទៅកើតក្នុងល្បឿនលឿនបានបុកជាមួយរថយន្តកំពុងឆ្លងផ្លូវពេញទំហឹង បណ្ដាលឱ្យម៉ូតូសណ្ដោងរ៉ឺម៉កក្រឡាប់ផ្ងារកង់រងរបួសធ្ងន់៣នាក់។ រីឯរថយន្តខូចខាតខាងមុខយ៉ាងដំណំ។ក្រោយមានគ្រោះថ្នាក់ សមត្ថកិច្ចបានចុះដល់ភ្លាមៗដើម្បីអន្តរាគមន៍និងបាននាំយកអ្នករងរបួសទៅមន្ទីរពេទ្យ៕ដោយ៖វិចិត្រ
