ភ្នំពេញ៖នៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅរសៀលថ្ងៃទី១១ ខែវិច្ឆិកា ឆ្នាំ២០២២ ប្រធានាធិបតីកូរ៉េខាងត្បូង លោក យូន ស៊ុកយុល (Yoon Suk-yeol) បានសន្យាបង្កើតនជំនួយទ្វេដង និងជំរុញការវិនិយោគឱ្យកាន់តែច្រើនមកកាន់ប្រទេសកម្ពុជា។
លោកប្រធានាធិបតី ក៏បានសម្តែងការពេញចិត្ត ចំពោះកិច្ចសហប្រតិបត្តិការទ្វេភាគី ជាពិសេសលើវិស័យពាណិជ្ជកម្ម វិនិយោគ ទំនាក់ទំនងរវាងរដ្ឋាភិបាល និងរដ្ឋាភិបាល, វិស័យឯកជន និងឯកជន ព្រមទាំងប្រជាជន និងប្រជាជន។
លោកប្រធានាធិបតីកូរ៉េខាងត្បូង បានកត់សម្គាល់ថា ក្នុងទំនាក់ទំនងរយៈពេលត្រឹមតែ ២៥ឆ្នាំទំហំពាណិជ្ជកម្មរវាងប្រទេសទាំងពីរ បានកើនឡើងជាង ២០ដង។ ឈរលើការរីកចម្រើនផ្នែកពាណិជ្ជកម្មនេះ កូរ៉េ ចាត់ទុកការអភិវឌ្ឍប្រកបដោយចីរភាពរបស់កម្ពុជា ជាការងារដ៏អាទិភាពមួយ។
លោកប្រធានាធិបតី បានលើកឡើងដែរថា ជំនួយក្រៅប្រទេសរបស់កូរ៉េ មកកាន់កម្ពុជា ត្រូវបានបង្កើនឡើងទ្វេដង សម្រាប់ជួយដល់ការអភិវឌ្ឍនៅកម្ពុជា ហើយកូរ៉េ នឹងជំរុញការវិនិយោគមកកាន់កម្ពុជា ឱ្យកាន់តែច្រើនឡើងដើម្បីពង្រឹងកិច្ចសហប្រតិបត្តិការ និងទំនាក់ទំនងរវាងប្រទេសទាំងពីរបន្ថែមទៀត។ ជាពិសេសក្តាប់យកឱកាសពីកិច្ចព្រមព្រៀងពាណិជ្ជកម្ម និងការមិនយកពន្ធរវាងប្រទេសទាំងពីរ៕ដោយៈសិរីមតី
