ភ្នំពេញ៖ ក្នុងកិច្ចប្រជុំកំពូលអាស៊ានកាលពីថ្ងៃទី១១ខែវិច្ឆិកា កម្ពុជាបានបង្ហាញ គម្រោងសាងសង់មជ្ឈមណ្ឌលភស្តុភារកម្មពហុបំណង ដ៏ធំមួយ នៅក្នុងប្រទេសកម្ពុជា ដែលមានទុនវិនិយោគជាង២០០លានដុល្លារ។
មជ្ឈមណ្ឌលភស្តុភារកម្មពហុបំណង PPLC នឹងក្លាយជាកន្លែងតភ្ជាប់សំខាន់ៗ សម្រាប់ការធ្វើពាណិជ្ជកម្មនៅក្នុងតំបន់ហើយអាចជួយពង្រឹងប្រទេសកម្ពុជឱ្យក្លាយជាមជ្ឈមណ្ឌលភស្តុភារកម្មដ៏សំខាន់ផងដែរ។
ពិធីបើកបង្ហាញគម្រោងសាងសង់មជ្ឈមណ្ឌលគម្រោងមជ្ឈមណ្ឌលភស្តុភារកម្មពហុបំណងភ្នំពេញ (Phnom Penh Logistics Complex ) ត្រូវបានធ្វើឡើង ក្រោមអធិបតីភាពលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ , លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូននិងលោកបណ្ឌិត Vivian Balakrishnan រដ្ឋមន្ត្រីក្រសួងការបរទេសសិង្ហបុរី។
មជ្ឈមណ្ឌលភស្តុភារកម្មពហុបំណងភ្នំពេញនេះ ត្រូវបានវិនិយោគសាងសង់ដោយក្រុមហ៊ុន YCH Groupដែលជាក្រុមហ៊ុនឡូជីស្ទីកនិងខ្សែច្រវាក់ផ្គត់ផ្គង់ដ៏ធំមួយនៅអាស៊ី។មជ្ឈមណ្ឌលភស្តុភារកម្មពហុបំណងPPLCនឹងក្លាយទៅជាគម្រោងឡូជីស្ទីកប្រកបដោយនិរន្តរភាព ដ៏ល្អមួយនៅក្នុងតំបន់អាស៊ាន។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន មានប្រសាសន៍ថា វិស័យដឹកជញ្ជូន និងភ័ស្តុភារកម្ម គឺជាវិស័យពីរ ដែលមានភាពប្រទាក់ ក្រឡាគ្នា និងជាឆ្អឹងខ្នង ហើយក៏ជាកម្លាំងជំរុញការតភ្ជាប់ សកម្មភាពសេដ្ឋកិច្ចលើគ្រប់វិស័យ រួមចំណែកដល់ផលិតភាព និងកំណើន សេដ្ឋកិច្ច។ លោកឧបនាយករដ្ឋមន្ត្រី បានបន្ថែមថា PPLC នឹងជួយពង្រឹងការតភ្ជាប់វិស័យដឹកជញ្ជូន និងភ័ស្តុភារកម្មក្នុងក្របខណ្ឌមហាអនុតំបន់មេគង្គ (GMS) អាស៊ាន និងពិភពលោកផងដែរ។
លោកទេសរដ្ឋមន្ត្រីស៊ុន ចាន់ថុល បានបន្ថែមថាPPLCដើរតួនាទីយ៉ាងសំខាន់មិនត្រឹមតែពង្រឹងការតភ្ជាប់របស់កម្ពុជាជាមួយពាណិជ្ជ កម្មក្នុងតំបន់ និងក្នុងចំណោមប្រទេសមហាអនុតំបន់មេគង្គ GMS ប៉ុណ្ណោះទេ តែក៏នឹងធ្វើឱ្យកាន់តែប្រសើរឡើងនូវប្រសិទ្ធភាពនៃការ ដឹកជញ្ជូនពហុមធ្យោបាយ រួមមានផ្លូវថ្នល់ ផ្លូវដែក ផ្លូវទឹក កំពង់ផែទឹកជ្រៅ និងការដឹកជញ្ជូនតាមផ្លូវអាកាសនៅកម្ពុជាជាអាទិ៍។
លោកទេសរដ្ឋមន្ត្រី បន្ថែមទៀតថា PPLC ក៏នឹងបង្កើតបានជាប្រព័ន្ធអេកូឡូជីស្ទីកប្រកបដោយប្រសិទ្ធភាព កាត់បន្ថយថ្លៃដើមដឹកជញ្ជូន ធ្វើឱ្យប្រសើរឡើងការប្រកួតប្រជែង រួមបញ្ចូលទាំងខ្សែច្រវាក់ផ្គត់ផ្គង់ និងលើកកម្ពស់កំណើនសេដ្ឋកិច្ចក្នុងតំបន់ទៀតផង។
«PPLC ត្រូវបានកំណត់ក្នុងផែនការមេនៃភស្តុភារកម្មរបស់យើងថា ជាគម្រោងយុទ្ធសាស្ត្រមួយ ដើម្បីគាំទ្រដល់ការធ្វើសមាហរណកម្មរបស់កម្ពុជា ទៅក្នុងបណ្តាញភស្តុភារឆ្លាតវៃរបស់អាស៊ាន (ASLN) ហើយក៏ដើម្បីជំរុញការអភិវឌ្ឍន៍សេដ្ឋកិច្ច និងការតភ្ជាប់អាជីវកម្មរបស់កម្ពុជានៅក្នុងតំបន់អាស៊ានយ៉ងពិតប្រាកដ»។ នេះជាការបញ្ជាក់របស់លោកទេសរដ្ឋមន្ត្រី ស៊ុន ចាន់ថុល។
ក្នុងពិធីដាក់បង្ហាញនេះ លោកបណ្ឌិត Vivian Balakrishnan បានលើកឡើងថា ប្រទេសសិង្ហបុរី កំពុងទន្ទឹងរង់ចាំធ្វើការជាមួយកម្ពុជា លើគម្រោងអនាគតស្រដៀងគ្នា ដើម្បីពង្រឹងទំនាក់ទំនងការទូតរវាងប្រទេសទាំងពីរ។
លោកបានបញ្ជាក់បន្ថែមថា ទំនាក់ទំនងអន្តរតំបន់ គឺជាសក្ខីភាពបង្ហាញពីទំនាក់ទំនងទ្វេរភាគីដ៏រឹងមាំរវាងកម្ពុជា-សឹង្ហបុរី ហើយក៏ជាទំនាក់ទំនងនៅក្នុងក្របខ័ណ្ឌអាស៊ានផងដែរ។ ទំនាក់ទំនងនេះ មានចរិតជាលក្ខណៈប្រកួតប្រជែងរួមរវាងបណ្តាប្រទេសជាសមាជិកអាស៊ាន៕ដោយៈសិរីមតី
