អ៊ុយក្រែនរាយការណ៍ថា កងទ័ពរុស្ស៊ីបានឆ្លៀតបំផ្លាញប៉មទូរទស្សន៍ និងហេដ្ឋារចនាសម្ព័ន្ធថាមពលនៅក្នុងតំបន់ឃើសន មុនពេលដែលពួកគេចាកចេញ។
![](https://cambodiaflashnews.com/wp-content/uploads/2021/06/top-banner.gif)
របាយការណ៍ពីគេហទំព័រ IMI អ៊ុយក្រែនបានដកស្រង់ប្រភពអ្នកស្រុកឃើសនផ្ទាល់កាលពីថ្ងៃព្រហស្បតិ៍ បានឲ្យដឹងថា ទាហានរុស្ស៊ីដែលបានដកថយចេញពីតំបន់ Kherson បានឆ្លៀតបំផ្ទុះផ្នែកមួយនៃមជ្ឈមណ្ឌលផ្សាយទូរទស្សន៍ និងខូចខាតហេដ្ឋារចនាសម្ព័ន្ធកម្ដៅ និងថាមពលនៅពេលថ្ងៃ។ របាយការណ៍បានបន្តថា “កងទ័ពបានបំផ្ទុះហេដ្ឋារចនាសម្ព័ន្ធទូរសព្ទចល័ត និងបានចាកចេញពីទីក្រុងដោយគ្មានថាមពល” ។ អភិបាលតំបន់ Kherson ខាងអ៊ុយក្រែន លោក Yaroslav Yanushevych បានសរសេរនៅលើ Telegram ថា ទាហានរុស្ស៊ីបាន“ដកហូតឧបករណ៍សាធារណៈ ខ្សែភ្លើង ហើយចង់ធ្វើបាបយើងឲ្យជាន់ដានពីក្រោយ”។
បន្ថែមពីនេះ ទីប្រឹក្សាអ៊ុយក្រែននិយាយថា រុស្ស៊ីចង់ឲ្យ Kherson ក្លាយជាទីក្រុងមរណៈ បន្ទាប់ពីពួកគេបានប្រកាសដកថយកាលពីថ្ងៃពុធ។ “រុស្ស៊ីចង់ប្រែក្លាយ Kherson ទៅជា “ទីក្រុងនៃសេចក្តីស្លាប់” ខណៈពួកគេបានចូលលួចឆែកឆេរតាមផ្ទះល្វែង និងបានរៀបចំផែនការវាយប្រហារទីក្រុងចេញពីត្រើយម្ខាងនៃទន្លេ Dnieper”។ ចំពោះការចោទប្រកាន់នេះ រុស្ស៊ីមិនបានឆ្លើយតបភ្លាមៗឡើយ៕
ប្រភព៖ ALJAZEERA
ប្រភពរូប៖ ALJAZEERA
ប្រែសម្រួល៖សុខ តុលា