ភ្នំពេញ៖រថយន្តម៉ាក Range Rover បានបុកម៉ូតូម៉ាក nex ពីក្រោយពេញទំហឹង បណ្ដាលឱ្យម៉ូតូដាច់ជា២កំណាត់ បុរសម្នាក់រងរបួសធ្ងន់។គ្រោះថ្នាក់ចរាចរនេះបានកើតឡើងនៅម្តុំស្តុបនាគបាញ់ទឹក តាមផ្លូវព្រះសីហនុ ក្នុងសង្កាត់ទន្លេបាសាក់ ខណ្ឌចំការមន កាលពីរំលងអធ្រាត្រឈានចូលថ្ងៃទី១០ ខែវិច្ឆិកា។
ពលរដ្ឋនៅជិតកន្លែងកើតហេតុបានឱ្យដឹងថា ដំបូងមានបុរសម្នាក់ជិះម៉ូតូម៉ាក Suzuki nex ផ្លាកលេខភ្នំពេញ 1FE-9147 តាមផ្លូវសុធារសពីត្បូងទៅជើង។
មកដល់កន្លែងខាងលើម៉ូតូបានឆ្លងស្តុបនាគបាញ់ទឹកស្រាប់តែមានរថយន្តម៉ាក Range Rover បើកតាមផ្លូវព្រះសីហនុពីលិចទៅកើតក្នុងល្បឿនយ៉ាងលឿន រួចបុកម៉ូតូពីក្រោយពេញទំហឹង បណ្ដាលឱ្យម៉ូតូដាច់ជា២កំណាត់ខូចខាតខ្ទេចខ្ទីនិងម្ចាស់រងរបួសធ្ងន់ ។រីរថយន្តបង្កខូចខាតផ្នែកខាងមុខយ៉ាងដំណំដែរ ហើយបន្តបើករត់គេចខ្លួនបាត់។ចំណែកម៉ូតូរបស់ជនរងគ្រោះ ត្រូវបានសមត្ថកិច្ចប៉ុស្ដិ៍នគរបាលរដ្ឋបាលទន្លេបាសាក់យកទៅរក្សាទុកបណ្ដោះអាសន្ន៕ដោយ៖វិចិត្រ
