ប្រធានាធិបតីរុស្ស៊ី លោកវ្ល៉ា ឌឹមៀរពូទីន នឹងមិនចូលរួមកិច្ចប្រជុំក្រុមប្រទេសសេដ្ឋកិច្ច G20 នៅកោះបាលីប្រទេសឥណ្ឌូណេស៊ីឡើយ ខណៈទំនងជាមានសម្ពាធប្រឈមមុខខ្លាំងជាមួយលោកខាងលិច។
![](https://cambodiaflashnews.com/wp-content/uploads/2021/06/top-banner.gif)
យោងតាមការជូនដំណឹងដោយមន្ត្រីឥណ្ឌូណេស៊ី និងរុស្ស៊ីនៅថ្ងៃព្រហស្បតិ៍ទី១០ ខែវិច្ឆិកានេះ បានឲ្យដឹងថា លោកវ្ល៉ា ឌឹមៀរពូទីន ប្រធានាធិបតីរុស្ស៊ី នឹងមិនមកចូលរួមដោយផ្ទាល់ក្នុងកិច្ចប្រជុំសេដ្ឋកិច្ចយក្ស G20 នៅកោះបាលីប្រទេសឥណ្ឌូណេស៊ីដោយផ្ទាល់ឡើយ។ វិមានក្រឹមឡាំងនឹងបញ្ជូនមន្រ្តីជាន់ខ្ពស់រដ្ឋមន្ត្រីការបរទេសលោក Sergei Lavrov មកតំណាងជំនួសវិញ។ តែបើតាមអ្នកនាំពាក្យរបស់រដ្ឋមន្ត្រីសម្របសម្រួលកិច្ចការដែនសមុទ្រ និងការវិនិយោគរបស់ប្រទេសឥណ្ឌូណេស៊ីបានឲ្យដឹងថា លោកពូទីននឹងចូលរួមកិច្ចប្រជុំមួយក្នុងរបៀបវាវៈតាមតំណតភ្ជាប់ពីចម្ងាយ។
ចំពោះមូលហេតុជាក់លាក់អ្នកនាំពាក្យស្ថានទូតរុស្ស៊ីប្រចាំប្រទេសឥណ្ឌូណេស៊ីមិនបានផ្តល់ការពន្យល់បន្ថែមនោះទេ។ ក៏ប៉ុន្តែកាលពីថ្មីៗនេះ រុស្ស៊ីត្រូវបានប្រឈមនឹងសម្ពាធយ៉ាងខ្លាំងជាមួយប្រទេសលោកខាងលិច។ បណ្តាប្រទេសជាច្រើន រួមទាំងអ៊ុយក្រែនបានស្នើឲ្យប្រធាន G20 ដកសិទ្ធិចូលរួម និងសមាជិករុស្ស៊ីជុំវិញវិនាសកម្មសង្រ្គាមដ៏ឃោរឃៅ។ ប្រធានាធិបតីឥណ្ឌូណេស៊ី លោក Joko Widodo បានឆ្លើយតបវិញថា មិនអាចធ្វើដោយឯកតោបានទេ ខណៈលោកកំពុងសម្រុះសម្រួលការកកិតភូមិសាស្ត្រនយោបាយដ៏រសើបនេះ៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា