កំពង់ស្ពឺ៖ភ្លើងបានឆាបឆេះរថយន្តទំនើបម៉ាក Range Rover មួយគ្រឿងនៅលើផ្លូវល្បឿនលឿនខ្ទេចអស់ទាំងស្រុង តែមិនបណ្តាលឱ្យគ្រោះថ្នាក់ដល់មនុស្សទេ។ហេតុការណ៍នេះបានកើតឡើងស្ថិតលើផ្លូវល្បឿនលឿន ម្តុំគីឡូម៉ែត្រ៥៦ ក្នុងឃុំមហាសាំង ស្រុកភ្នំស្រួច ខេត្តកំពង់ស្ពឺ កាលពីរសៀលថៃ្ង៨ ខែវិច្ឆិកា។
សមត្ថកិច្ចគោលដៅបានឱ្យដឹងថា ភ្លើងឆាបឆេះរថយន្ត Range Rover នោះខាងក្រុមផ្លូវល្បឿនលឿនបានស្នើសុំអន្ដរាគមន៍ពីកម្លាំងជំនាញនគរបាលខេត្តកំពង់ស្ពឺ ហើយក៏ចេញរថយន្តពន្លត់អគ្គិភ័យមកជួយចំនួន២គ្រឿង។
តែដោយសារតែរថយន្ដកំពុងឆេះស្ថិតនៅលើផ្លូវល្បឿនលឿន ពិបាកក្នុងការឡើងអន្ដរាគមន៍ព្រោះច្រកចូល-ឡើងផ្លូវនៅឆ្ងាយ មិនអាចមកទាន់ពេលវេលា ត្រូវភ្លើងឆេះខ្ទេចអស់គ្មានសល់។ទោះយ៉ាងណា គ្រោះថ្នាក់ឆេះរថយន្ដទំនើប សង្ស័យមកពីឆ្លងចរន្ដភ្លើង មិនបណ្ដាលឱ្យមនុស្សរងគ្រោះថ្នាក់ទេ៕ដោយ៖វិចិត្រ
