កីឡាករ Gerard Pique ត្រូវបានបណ្តេញចេញ នៅពាក់កណ្តាលតង់នៃការប្រកួតចុងក្រោយរបស់ខ្លួន មុនពេលចូលនិវត្តន៍ ដោយការពិន័យនេះ អាចទំនងមកពីការទៅបង្ហាញប្រតិកម្មខឹងសម្បា ចំពោះលោកអាជ្ញាកណ្តាល ប៉ុន្តែយ៉ាងណាក្ដី សម្រាប់ការប្រកួតវិញ ក្រុមអ្នកមានបុណ្យ Barcelona បានវាយបកយកឈ្នះ Osasuna ២-១ ហើយបាននាំមុខដាច់ ៥ពិន្ទុដាច់ នៅទីកំពូលតារាងនៃក្របខ័ណ្ឌ La Liga កាលពីថ្ងៃអង្គារ។
កីឡាករ Pique វ័យ ៣៥ឆ្នាំ ដែលបានគ្រវីដៃលាទៅកាន់អ្នកគាំទ្រ ក្នុងកីឡដ្ឋាន Camp Nou កាលពីចុងសប្តាហ៍មុន បានបង្ហាញអារម្មណ៍មួម៉ៅនឹងការសម្រេចចិត្តរបស់អាជ្ញាកណ្តាល លោក Jesus Gil Manzano ដែលផ្ដល់ការកាតលឿងទី ២ ដល់ខ្សែប្រយុទ្ធ Robert Lewandowski របស់ក្រុម Barca នៅនាទីទី៣១។
Pique ដែលត្រូវបានឈ្មោះជាកីឡាករបម្រុង ដោយគ្រូបង្វឹករបស់ក្រុម Barca លោក Xavi Hernandez បានវូលទៅកៀកលោក Manzano ដើម្បីសម្ដែងការអាការខឹងសម្បា ពេលសម្រាកវគ្គទី១។
លោក Xavi បាននិយាយថា៖ «ខ្ញុំនឹងដាក់ឱ្យរូបគេលេង។ យើងបានដឹងថា កីឡាករ Andreas (Christensen) ទើបត្រឡប់មកពីរបួស ដូច្នេះ រូបគេមានចង្វាក់នៃការលេងមិនគ្រប់គ្រាន់។ កីឡាករ Eric Garcia កំពុងមានអារម្មណ៍ឈឺចាប់ ដូច្នេះ មែនហើយ កីឡាករ Gerard ត្រូវតែប្ដូរដាក់ឱ្យលេង»។
«ប៉ុន្តែរូបគេត្រូវបានបណ្ដេញចេញត្រឹមពាក់កណ្ដាលតង់។ វាគឺជាលទ្ធផលនៃភាពតានតឹង នាពេលនោះ។ យើងមានអារម្មណ៍ថា មិនយុត្តិធម៌ ហេតុដូច្នេះហើយ ទើបនាំឱ្យមានប្រតិកម្មរបស់ Gerard»។ លោក Xavi បានបន្ថែម។
នៅទីលានឯណោះវិញ នោះទើបតែជាការទទួលបានកាតក្រហមជាលើកទី ២ នៃអាជីពរបស់ខ្លួន សម្រាប់កីឡាករ Lewandowski ដោយការពិន័យកាតលឿងទី ២ នោះ កើតមាន បន្ទាប់ពីខ្សែប្រយុទ្ធសញ្ជាតិប៉ូឡូញ លោតប្រជែងយកបាល់ជាមួយ David Garcia ដែលជាកីឡាករស៊ុតបញ្ចូលទីឱ្យក្រុម Osasuna នាំមុខនៅនាទីទី៦។
ប៉ុន្តែយ៉ាងក្ដី ក្លិបយក្សនៃតំបន់កាតាឡាន ទោះមានសមាជិកតែ ១០នាក់ ក៏នៅតែអាចធ្វើការតបតបានវិញ បន្ទាប់ពីកីឡាករ Pedri ទម្លុះសំណាញ់ទីឱ្យក្រុមភ្ញៀវតាមស្មើ នៅនាទីទី៤៨ ហើយបន្ទាប់មកខ្សែបម្រើស្លាបប្រេស៊ីល Raphinha បានតែតបាល់បញ្ចូលទីគ្រាប់បាល់ជ័យជម្នះ នៅមុនប្រមាណជា ៥នាទីនៃពេលវេលាដែលត្រូវបញ្ចប់ជាផ្លូវការ។
ការដណ្ដើមបាន ៣ពិន្ទុនេះ នាំឱ្យក្រុម Barca មានគម្លាត ៥ពិន្ទុពីលើក្រុមគូប្រជែងស្លាប់រស់ Real Madrid ដែលរងបរាជ័យយ៉ាងគួរឱ្យភ្ញាក់ផ្អើល ក្នុងលទ្ធផល ៣-២ នៅឯផ្ទះរបស់ក្រុម Rayo Vallecano កាលពីថ្ងៃចន្ទ៕
