ខាងក្រោមនេះ គឺប្រវត្តិរឿងរ៉ាវសង្ខេបត្រួសៗរបស់ក្រុមជម្រើសជាតិអង់គ្លេស ដែលស្ថិតក្នុងពូល B នៅឯព្រឹត្តិការណ៍ World Cup 2022 នាប្រទេសកាតា:
-សមិទ្ធផលល្អបំផុត: ជើងឯក ក្នុងឆ្នាំ១៩៦៦
-សមិទ្ធផលកិត្តិយសផ្សេងទៀត: មិនមាន
-ចំណាត់ថ្នាក់របស់ FIFA: លេខ ៥
-ដណ្ដើមបានសិទ្ធិយ៉ាងដូចម្ដេច:
ក្រុមជម្រើសជាតិអង់គ្លេសបញ្ចប់វគ្គជម្រុះប្រចាំទ្វីបអឺរ៉ុប ដោយឈរលេខ ១ ក្នុងពូល I ដែលរួមមានក្រុមប៉ូឡូញ អាល់បានី ហុងគ្រី អង់ដូរ៉ា និងសាន់ម៉ារីណូ។
-គ្រូបង្វឹក/អ្នកចាត់ការ: លោក Gareth Southgate វ័យ ៥២ឆ្នាំ
លោកត្រូវបានតែងតាំងក្នុងឆ្នាំ២០១៦ ហើយបានកែប្រែក្រុម ដែលមានស្រាប់ ដោយដឹកនាំក្រុមអង់គ្លេសឡើងដល់វគ្គ ១/២ ផ្តាច់ព្រ័ត្រ នៅ World Cup 2018 និងបញ្ចប់នូវចំណាត់ថ្នាក់ជើងឯករង នៅ Euro 2020 ដែលជាការបង្ហាញខ្លួនជាលើកដំបូងរបស់ពួកគេ នៅវគ្គផ្តាច់ព្រ័ត្រ ក្នុងព្រឹត្តិការណ៍ធំ សម្រាប់រយៈពេល ៥៥ឆ្នាំ។
តែយ៉ាងណាក្ដី បរាជ័យដ៏ឈឺចាប់ ក្នុងវគ្គប៉េណាល់ទីកាត់ក្ដីដោយសារក្រុមអ៊ីតាលី ក្នុងវគ្គផ្តាច់ព្រ័ត្រ នៅ Euro បានបង្កឱ្យមានការរិះគន់ ចំពោះយុទ្ធសាស្ត្រប្រកបដោយការប្រយ័ត្នប្រយែងរបស់លោក Southgate ដែលនៅតែបន្តតាមលងបន្លាចលើគ្រូបង្វឹករូបនេះ។
–កីឡាករសំខាន់: Harry Kane
កីឡាករ Kane អាចនឹងក្លាយជាអ្នកស៊ុតបញ្ចូលទីបានច្រើនជាងគេគ្រប់កាលរបស់ក្រុមអង់គ្លេស នៅ World Cup នេះ បន្ទាប់ពីរកបាន ៥១គ្រាប់ សម្រាប់ក្រុមតោកំណាច ដោយតាមពីក្រោយម្ចាស់កំណត់ត្រាចាស់លោក Wayne Rooney ត្រឹមតែ ២គ្រាប់ប៉ុណ្ណោះ។ កីឡាករឆ្នើមរបស់ក្រុម Tottenham Hotspur រូបនេះ មិនធ្លាប់បានឈ្នះពានរង្វាន់ធំជាមួយក្លិប ឬប្រទេសជាតិរបស់ខ្លួននោះឡើយ ប៉ុន្តែសញ្ជាតិញាណជាអ្នកប្រយុទ្ធ បានធ្វើឱ្យរូបគេក្លាយជាខ្សែប្រយុទ្ធដ៏កំពូលម្នាក់របស់ពិភពលោក។
ការធ្វើយ៉ាងណាឱ្យកីឡាករ Kane មិនមានរបួសមករំខាន និងបន្តស៊ុតបញ្ជូលទី នឹងជាអាទិភាពចម្បងរបស់លោក Southgate នៅប្រទេសកាតា នាចុងខែនេះ។
-កាលវិភាគប្រកួត ក្នុងវគ្គសន្សំពិន្ទុតាមពូល:
-ថ្ងៃទី២១ ខែវិច្ឆិកា: អង់គ្លេស ប៉ះ អ៊ីរ៉ង់
-ថ្ងៃទី២៥ ខែវិច្ឆិកា: អង់គ្លេស ប៉ះ អាមេរិក
-ថ្ងៃទី២៩ ខែវិច្ឆិកា: វេលស៍ ប៉ះ អង់គ្លេស៕