សហរដ្ឋអាម៉េរិកនិងកូរ៉េខាងត្បូង បានប្រកាសព្រមានបញ្ចប់របបគីមជុងអ៊ុន ក្នុងករណីដែលហ៊ានបើកការវាយប្រហារនុយក្លេអ៊ែរមកលើដៃគូ ឬសម្ព័ន្ធមិត្តរបស់ខ្លួន។
![](https://cambodiaflashnews.com/wp-content/uploads/2021/06/top-banner.gif)
រដ្ឋមន្ត្រីការពារជាតិកូរ៉េខាងត្បូង លោក Jong-Sup Lee បាននិយាយនៅចុងសប្តាហ៍នេះក្នុងសន្និសីទសារព័ត៌មានរួមគ្នាជាមួយរដ្ឋមន្ត្រីការពារជាតិអាម៉េរិក Lloyd Austin ថា “រាល់ការវាយប្រហារនុយក្លេអ៊ែរប្រឆាំងនឹងសហរដ្ឋអាម៉េរិក ឬសម្ព័ន្ធមិត្ត និងដៃគូរបស់ខ្លួន រួមទាំងការប្រើប្រាស់អាវុធនុយក្លេអ៊ែរដែលមិនមែនជាយុទ្ធសាស្ត្រ គឺមិនអាចទទួលយកបានទេ ហើយនឹងនាំឱ្យមានការបញ្ចប់នៃរបបលោក Kim តែម្តង” ។ រដ្ឋមន្ត្រីការពារជាតិអាម៉េរិក លោក Lloyd Austin បានចោទប្រកាន់កូរ៉េខាងជើងថា “បានបង្កសកម្មភាពមិនទទួលខុសត្រូវ និងគ្មានការប្រុងប្រយ័ត្ន”។ ដោយនិយាយថា “សកម្មភាពទាំងនេះកំពុងបង្កអស្ថិរភាពដល់តំបន់ដែលមានសក្តានុពល។ ដូច្នេះ យើងសូមអំពាវនាវឱ្យពួកគេបញ្ឈប់សកម្មភាពទាំងនេះ ហើយចាប់ផ្តើមចូលរួមក្នុងការសន្ទនាដ៏ជាក់លាក់មួយ”។
មិនទាន់មានការឆ្លើយតបពីកូរ៉េខាងជើងភ្លាមៗនោះទេ។ ភាពតានតឹងនៅឧបទ្វីបកូរ៉េកំពុងផ្ទុះឡើងខ្លាំងឡើងៗគួរឲ្យព្រួយបារម្ភតាំងពីថ្ងៃចន្ទមក។ កូរ៉េខាងជើងបានបាញ់ មីស៊ីលផ្លោងរំលងប្រទេសជប៉ុនជាលើកទី២ ហើយកាលពីល្ងាចថ្ងៃសុក្រ ទី៤ ម្សិលមិញនេះកូរ៉េខាងជើងក៏បានដាក់ពង្រាយជាបន្តបន្ទាប់នូវយន្តហោះចម្បាំងរហូតទៅដល់ ១៨០គ្រឿងផងដែរ។ កូរ៉េខាងជើងបានប្រាប់ថា ពួកគេចង់ឲ្យអាម៉េរិកនិងកូរ៉េខាងត្បូងបញ្ឈប់សមយុទ្ធយោធាក្នុងតំបន់ភ្លាមៗ ជៀសវាងលទ្ធផលអាក្រក់ជាងនេះ។ យ៉ាងណាក៏ដោយ អាម៉េរិកនិងកូរ៉េខាងត្បូងនឹងមិនធ្វើតាមការទាមទារនោះទេ សមយុទ្ធ Vigilant Storm នឹងត្រូវអូសបន្លាយដល់ដំណាច់សប្តាហ៍ដើម្បីតាមដានស្ថានការណ៍តានតឹងកូរ៉េ៕
ប្រភព៖ CNN
ប្រភពរូប៖CNN
ប្រែសម្រួល៖សុខ តុលា