មន្ទីរបញ្ចកោណនិយាយថា កងកម្លាំងអ៊ុយក្រែននឹងរំដោះយកតំបន់ឃើសនភាគខាងត្បូងពីរុស្ស៊ីមកវិញក្នុងពេលឆាប់ៗនេះ ព្រោះទ័ពអ៊ុយក្រែនមានសមត្ថភាពខ្លាំងណាស់។
រដ្ឋមន្ត្រីការពារជាតិអាម៉េរិក លោក Lloyd Austin បាននិយាយប្រាប់សន្និសីទសារព័ត៌មាននៅមន្ទីរបញ្ចកោណកាលពីថ្ងៃព្រហស្បតិ៍ថា កងកម្លាំងអ៊ុយក្រែនអាចរំដោះយកទីក្រុង Kherson ភាគខាងត្បូងយុទ្ធសាស្ត្រមកវិញពីកងទ័ពរុស្ស៊ីយ៉ាងពិតប្រាកដ សហរដ្ឋអាម៉េរិកជឿជាក់យ៉ាងដូច្នេះ។ លោកបន្តថា “ យើងបានឃើញពួកគេចូលរួមក្នុងកិច្ចខិតខំប្រឹងប្រែងវិធីសាស្ត្រមុតស្រួចវៃឆ្លាត ដែលមានប្រសិទ្ធភាពក្នុងការរំដោះយកទឹកដីអធិបតេយ្យភាពរបស់ពួកគេមកវិញ”។
នាពេលចុងក្រោយនេះ បច្ចុប្បន្នភាពនៅឃើសនមិនទាន់ត្រូវបានរាយការណ៍ជាហូរហែនោះទេ។ គ្រាន់តែដឹងថា ការប្រយុទ្ធគ្នាកំពុងបន្តពីមួយថ្ងៃទៅមួយថ្ងៃ រុស្ស៊ីហាក់ដូចជាចាញ់ប្រៀប ព្រមទាំងបានជម្លៀសប្រជាជនជាច្រើនគ្រួសារតាមបណ្តោយទន្លេ Dnipro ផងដែរ ដោយលើកហេតុផលថា ខ្លាចអ៊ុយក្រែនបាញ់ផ្តាច់ទំនប់ទឹក។
បើតាមវីដេអូមួយរបស់អ្នកកាសែតឃ្លាំមើល BBC លោក Francis Scarr បានបង្ហោះនៅលើធ្វីតធ័រ ទង់ជាតិរុស្ស៊ីដែលធ្លាប់ដោតលើអគាររដ្ឋបាលនៅឃើសន ស្រាប់តែបាត់មិនបានដោតទៀតទេ។ លោក Kirill Stremousov អនុប្រធាន Kherson ដែលដំឡើងដោយរុស្ស៊ីបាននិយាយថា កងទ័ព “ទំនងជា” នឹងចាកចេញពីច្រាំងខាងលិចនៃទន្លេ Dnipro ហើយផ្លាស់ទីទៅភាគខាងកើត៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
