ភ្នំពេញ៖ស្ត្រីម្នាក់ចេញពីធ្វើការជិះផាស្អេបទៅផ្ទះវិញ ស្រាប់តែមានក្រុមចោរជិះម៉ូតូ៣គ្រឿងមកឆក់យកកាបូបស្ពាយមានលុយនិងឯកសារពាក់ព័ន្ធមួយចំនួន រួចបើកគេចខ្លួនបាត់អស់។
ករណីនេះបានកើតឡើងនៅជិតច្រមុះជ្រូកក្បាលថ្នល់ ផ្លូវព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន កាលពីម៉ោងរំលងអធ្រាត្រចូលថ្ងៃទី៤ ខែវិច្ឆិកា។
ស្ត្រីម្ចាស់កាបូបបានឱ្យដឹងថា ខ្លួនឈ្មោះអឿន ស្រីរ័ត្ន អាយុ៣០ឆ្នាំ ជាបុគ្គលិកក្រុមហ៊ុនឯកជន ស្នាក់នៅសង្កាត់វាលស្បូវ ខណ្ឌច្បារអំពៅ។នៅក្នុងកាបូបដែលបាត់បង់មានលុយជាង៨០ដុល្លារ-កាត ATM ១សន្លឹក -កាតចាក់វ៉ាក់សាំង១សន្លឹកនិងអត្តសញ្ញាណប័ណ្ណសញ្ជាតិខ្មែរ១សន្លឹក។
នាងបានបន្តថា មុនកើតហេតុ រូបគាត់បានចេញពីធ្វើការ បានជិះផាស្អេបចេញពីកោះពេជ្រ ត្រឡប់ទៅផ្ទះវិញនៅម្តុំវាលស្បូវ ខណ្ឌច្បារអំពៅ ។មកដល់ក្រោមស្ពានអាកាសក្បាលថ្នល់ស្រាប់តែក្រុមជនសង្ស័យមានគ្នា៣នាក់ ជិះម៉ូតូ៣គ្រឿងមកឆក់យកកាបូបស្ពាយដាក់ក្បែរខ្លួនក្នុងផាស្អេបបានសម្រេច រួចជិះម៉ូតូគេចខ្លួនបាត់អស់៕ដោយ៖វិចិត្រ
