កីឡាករ Sergio Ramos និង Gerard Pique នឹងត្រូវដកចេញទាំង ២នាក់ពីក្នុងបញ្ជីឈ្មោះក្រុមចុងក្រោយរបស់ក្រុមជម្រើសជាតិអេស្ប៉ាញ សម្រាប់ការប្រកួតប្រជែងនៅឯព្រឹត្តិការណ៍ FIFA World Cup នាពេលខាងមុខនេះ។
កីឡាករ Pique មិនបានលេងឱ្យក្រុមជម្រើសជាតិរបស់ខ្លួននោះទេ ចាប់តាំងពីពួកគេត្រូវបានទម្លាក់ក្នុងវគ្គ ១៦ក្រុមចុងក្រោយ នៅឯ World Cup 2018 ដោយក្រុមរុស្ស៊ី ខណៈដែលកីឡាករ Ramos ក៏មិនបានលេងដែរ ចាប់តាំងពីដើមឆ្នាំមុន។
ទោះបីជាយ៉ាងនោះក្ដី ខ្សែការពារចាស់វស្សាទាំង២ ត្រូវបានបញ្ចូលឈ្មោះក្នុងក្រុម ដែលត្រូវជ្រើសរើស ក្នុងចំណោម ៥៥នាក់ដំបូងរបស់គ្រូបង្វឹកលោក Luis Enrique ហើយអ្នកខ្លះជឿថា អ្នកចាត់ការរូបនេះអាចយកយ៉ាងហោចណាស់ម្នាក់ ក្នុងចំណោមពួកគេ ដើម្បីបន្ថែមបទពិសោធខ្លះទៅក្នុងក្រុម ដែលមើលទៅហាក់នៅក្មេងខ្ចីណាស់។
ជាពិសេស កីឡាករ Ramos ទំនងជាមានឱកាសល្អ ក្នុងការបានធ្វើដំណើរទៅប្រទេសកាតាជាមួយនឹងប្រទេសរបស់ខ្លួន បន្ទាប់ពីធ្វើបានល្អ សម្រាប់ក្រុម Paris Saint-Germai (PSG) នាពេលថ្មីៗនេះ។ តែយ៉ាងណាក៏ក្ដី យោងទៅតាមកាសែត Marca កីឡាករទាំង២ មិនត្រូវកាត់បញ្ចូលក្នុងបញ្ជីឈ្មោះចុងក្រោយឡើយ ដោយទាំង ២នាក់ ជាផ្នែក១ នៃអ្នកសំណាងមិនល្អ ២៩រូប ដែលនឹងត្រូវដកឈ្មោះចេញពីក្រុម។
ការចុះផ្សាយរបស់បណ្ដាញសារព័ត៌មាននៅអេស្ប៉ាញ បានឱ្យដឹងថា លោក Enrique មិនចង់ឱ្យកីឡាករណាម្នាក់ជាចំណុចកណ្តាលនៃការទាក់ទាញចំណាប់អារម្មណ៍ ឬប្រជែងឥទ្ធិពលរបស់ខ្លួននោះឡើយ ហើយហេតុដូច្នេះ ត្រូវបានកំណត់ឱ្យចេញត្រឡប់ផ្ទះទាំង ២នាក់តែម្ដង។
ជំនួសមកវិញ ខ្សែការពារកណ្តាល ដែលគាត់នឹងត្រូវយកទៅធ្វើជារបងរបស់ក្រុមគោជល់អេស្ប៉ាញ នៅ World Cup ក្នុងនោះមានដូចជាកីឡាករ Eric Garcia, Aymeric Laporte, Inigo Martinez និង Pau Torres ដោយកីឡាករ ២នាក់ខាងដើម ទំនងជាមានសិទ្ធិខ្ពស់បំផុត ក្នុងការបានលេងជម្រើសដំបូង។
កីឡាករ Ramos អាចនឹងត្រូវបានកោះហៅចូលក្រុម ប្រសិនបើមាននរណាម្នាក់រងរបួស ប៉ុន្តែកីឡាករ Pique ប្រហែលមិនអាចទេ ដោយសាររូបគេមិនបានចូលលេងច្រើនឱ្យក្រុម Barcelona ក្នុងរដូវកាលនេះ ហើយក៏ធ្វើមិនសូវបានល្អនោះឡើយ នៅពេលបានចូលទីលាន។ កីឡាករ Diego Llorente និង Hugo Guillamon ទំនងជាមានអាទិភាពជាង ប្រសិនបើមានករណីចាំបាច់៕
