លោក Stefano Pioli បានពោលថា ក្រុម AC Milan របស់លោក ទើបតែបានបោះជំហានដំបូងរបស់ខ្លួនប៉ុណ្ណោះ ក្នុងការវិលត្រឡប់ទៅកាន់ពេលវេលាដ៏អស្ចារ្យវិញ បន្ទាប់ពីដឹកនាំក្រុមយក្សអ៊ីតាលីឱ្យបានឡើងទៅវគ្គបន្ទាប់ នៅក្របខ័ណ្ឌ Champions League លើកដំបូង ក្នុងរយៈពេល ៩ឆ្នាំ។
សប្តាហ៍របស់លោក Pioli បានចាប់ផ្តើមចេញដំណើរក្នុងទម្រង់ដ៏ល្អឥតខ្ចោះ ដោយការបន្តកិច្ចសន្យាជាមួយក្លិប Milan ដល់ឆ្នាំ២០២៥ កាលពីថ្ងៃចន្ទ ហើយគាត់ក៏បានផ្តល់រង្វាន់ដល់ក្លិបជាមួយនឹងជ័យជម្នះ ៤-០ លើក្រុម Salzburg កាលពីយប់ថ្ងៃពុធ ដែលលទ្ធផលនេះ បានជួយធានាចំណាត់ថ្នាក់លេខ ២ ក្នុងពូល E ដោយនៅពីក្រោមក្រុមតោខៀវ Chelsea។
ការឈានរបស់ក្រុម Milan រហូតដល់វគ្គ ១៦ក្រុមចុងក្រោយនៃការប្រកួតប្រជែងកម្រិតកំពូលរបស់អឺរ៉ុបនេះ ធ្វើឱ្យក្រុមជើងឯកនៃក្របខ័ណ្ឌ Serie A មានជីវិតជីវ៉ាឡើងវិញ ក្រោមការដឹកនាំរបស់លោក Pioli ប៉ុន្តែគ្រូបង្វឹកវ័យ ៥៧ឆ្នាំរូបនេះ ចង់ឱ្យក្រុមរបស់គាត់មានគោលដៅខ្ពស់ជាងនេះទៀត។
លោក Pioli បានប្រាប់អ្នកសារព័ត៌មានថា៖ «វាទើបតែជាជំហានដំបូងប៉ុណ្ណោះ យើងមិនអាចបញ្ឈប់ត្រឹមនេះឡើយ។ ប្រសិនបើយើងចង់ជោគជ័យនៅអឺរ៉ុប យើងមិនអាចពេញចិត្តត្រឹមតែការបានឡើងទៅវគ្គ ១៦ក្រុមចុងក្រោយនោះទេ ប៉ុន្តែត្រូវព្យាយាមបន្តទៅមុខទៀត»។
ការបញ្ចប់នៅលេខ២ ធ្វើឱ្យក្រុម Milan អាចជួបជាមួយក្រុម Bayern Munich, Manchester City ឬ Real Madrid នៅជុំបន្ទាប់ ដោយការប្រកួតជើងទី ២ ត្រូវលេងក្រៅផ្ទះ។
ការសង្ស័យ ជុំវិញក្រុមដ៏គួររំភើបរបស់លោក Pioli គឺសមត្ថភាពរបស់ពួកគេក្នុងការដោះស្រាយជាមួយនឹងក្រុមកំពូលៗ របស់ទ្វីបអឺរ៉ុប ខណៈដែលពួកគេចាញ់ក្រុម Chelsea យ៉ាងស្រួលៗ ក្នុងការប្រកួតទាំង ២ជើងរបស់ពួកគេ ជាមួយក្លិបយក្ស នៅក្របខ័ណ្ឌ Premier League មួយនេះ។
លោក Pioli បានបន្ថែមថា៖ «នេះតែងតែជាក្រុមអ្នកនៃកីឡាករ ដែលមានការស្រេកឃ្លាន និងមហិច្ឆតាយ៉ាងខ្លាំងក្លាក្នុងការធ្វើអ្វីគ្រប់យ៉ាងដែលអាចធ្វើទៅបាន។ យើងជាជើងឯក នៅអ៊ីតាលី យើងមិនបានដណ្ដើមសិទ្ធិមក Champions League តាមវិធីចាស់នោះទេ។ យើងជាក្រុមល្អ។ ក្រុមណាដែលយើងប្រកួតជាមួយ នឹងក្លាយជាក្រុមល្អ។ ក្រុមណាដែលឈ្នះជយលាភីលេខ ១ ក្នុងពូលរបស់ពួកគេ ក៏មានសមត្ថភាពឈ្នះជើងឯក Champions League បានដូចគ្នាដែរ»។
ការចាប់ឆ្នោតសម្រាប់វគ្គ ១៦ក្រុមចុងក្រោយនៃក្របខ័ណ្ឌ Champions League នេះ នឹងធ្វើឡើងនៅទីក្រុង Nyon ប្រទេសស្វីស នាថ្ងៃចន្ទសប្ដាហ៍ក្រោយ៕
